Premer-Mınıstr Asqar Mamınniń tóraǵalyǵymen ótken QR Úkimetiniń otyrysynda Premer-Mınıstrdiń birinshi orynbasary - Qarjy mınıstri Álıhan Smaıylov memlekettik bıýdjettiń oryndalýy jáne 2020 jylǵy qańtar-sáýir aılaryndaǵy bank salasynyń jaı-kúıi týraly baıandady. Bul týraly primeminister.kz habarlady.
Á. Smaıylov atap ótkendeı, aǵymdaǵy jylǵy 4 aıdyń qortyndysy boıynsha memlekettik bıýdjetke 2,7 trln teńge kiris tústi. Jospar 103,9%-ǵa atqaryldy. Respýblıkalyq bıýdjetke 1,7 trln teńge kiris tústi.
Salyqtar boıynsha jospar 61 mlrd teńgege oryndalmady. Onyń negizgi somalary QQS jáne KTS esebinen. Jospardyń oryndalmaýyna syrtqy naryqtaǵy faktorlar da áser etýde.
Negizgi eksporttyq pozısııalar boıynsha 2019 jyldyń 4 aıymen salystyrǵanda baǵalar orta eseppen 19%-ǵa jáne jyl basynan 15%-ǵa tómendedi.
Qyzmet kórsetý salalarynan da túsim azaıdy.
Jergilikti bıýdjetterdiń óz kiristeri 119%-ǵa oryndalyp, 1,3 trln teńgeni qurady. Barlyq óńirlerde kiristerdiń jospary artyǵymen oryndaldy.
Memlekettik bıýdjet shyǵystary 97,7%-ǵa, respýblıkalyq 98,6%-ǵa, jergilikti bıýdjetter 97,1%-ǵa atqaryldy.
«Respýblıkalyq bıýdjettiń shyǵystary esepti kezeńde 4 ,3 trln teńgeni qurady. 62 mlrd teńgege atqarylmady. Onyń 14 mlrd teńgesi únemdeý boldy. Igerilmeý somasy 48 mlrd teńgeni qurady. Igerilmeýdiń negizgi sebepteri — konkýrstyq rásimderdi uzaq jáne ýaqtyly ótkizbeý, naqty kórsetilgen qyzmet kólemi, atqarylǵan jumystarǵa aqy tóleý, kelisimderdi jasasý rásimderin uzaq júrgizý, sotta talap-aryz jumystaryn júrgizý», — dep túsindirdi Á. Smaıylov.
Naqtylanǵan bıýdjette daǵdarysqa qarsy sharalarǵa qosymsha 1,1 trln teńge qarastyldy. Bul somanyń 70%-y jergilikti bıýdjetterge «Eńbek» memlekettik baǵdarlamasy, «Aýyl - El besigi», Bıznestiń jol kartasy aıasynda kásipkerlerdiń jobalaryn sýbsııadalaýǵa jáne kepildendirýge, agroónerkásip keshenin sýbsııadalaýǵa kózdelgen.
«Barlyq qajetti bıýdjettik prosedýralar júzege asyryldy. Memlekettik satyp alýlar jeńildetilgen prosedýralar arqyly júrgizilýde. Osy qarajattyń ıgerilý barysy qatań baqylaýda bolady», — dedi Á. Smaıylov.