Soltústik Qazaqstan oblysynyń polıseıleri 60 tonnaǵa jýyq astyq dánin urlaǵan urylardyń izin kesti, – dep habarlaıdy Polisia.kz.
Soltústik Qazaqstan oblysynyń saqshylary sáýirdiń 27-nen bastap «Astyq» jedel-profılaktıkalyq is-sharasyn ótkizip jatyr. Aýyl sharýashylyǵy kásiporyndaryndaǵy múlikterdiń urlyǵyn izin sýytpaı ashý jáne ony boldyrmaý maqsatynda aýdandarda mobıldik toptar quryldy. Olar qarańǵy túse aınalma joldar men dalaly jerlerdegi joldardy baqylaıdy, aýyl sharýashylyq ónimderin tasymaldaýmen aınalysatyn júrgizýshilerdiń qoldaryndaǵy qujattardy tekseredi. Profılaktıkalyq is-shara bastalǵanǵa deıin ár aýdanda agrarıılermen kezdesýler ótkizildi. Kezdesýler kezinde kásiporyndardyń tehnıkalyq nyǵaıtylýy jáne qaýipsizdik qyzmetteriniń polıseılermen is-qımyl jasaýy talqylandy.
Aıta ketetin bolsaq, ózara is-qımyl jasaý Jambyl aýdanyndaǵy JShS birinen astyq urlyǵyn ashýda mańyzdy kómek boldy. 30 sáýirde onda sebýge daıyndap qoıǵan tuqymnyń 59 tonnasy jetpeıtini anyqtalǵan.
Keltirilgen shyǵyn 6 mln teńgeden astam. Aýdandyq PB basshysy Asan Qaıdarov habarlaǵandaı, jedel-tergeý toby oqıǵa ornyna dereý jetken, sol kezeńde kásiporynnyń kúzetshileri 27 sáýirge qaraǵan túni beınekameralardy sóndirý faktisin anyqtaǵan. Bul birden polıseılerdiń jumysty tıisti baǵytta júrgizýine septigin tıgizdi. Sol kúni kúdiktiler anyqtaldy: olar 1964, 1965 jáne 1989 jyldary týǵan JShS jumysshylary men 56 jastaǵy jergilikti kásipker bolyp shyqty.
Sońǵysy ýaqytsha ustaý ızolıatoryna qamalyp, keıin kepildikpen bosatylǵan. Qalǵandaryna qatysty mindetti túrde kelý túrindegi bultartpaý sharasy tańdaldy. QR Qylmystyq kodeksiniń 188-babynyń 4-bóligi (urlyq) boıynsha sotqa deıingi tergep-tekserý júrgizilip jatyr. Tuqym tıelgen úsh «KamAZ» avtokóligi alynyp, urlanǵan astyq ıesine qaıtaryldy.