Bas memlekettik sanıtarlyq dáriger Aıjan Esmaǵambetova búginde elimizde koronavırýstan emdelgender sany indet juqtyrǵandardan kóbeıip kele jatqanyn aıtty.
«Búginde koronavırýstan emdelgender sany 2074-ke jetti. Keshe ǵana 130 adam emdelip shyqty. Búgin taǵy 15 adam emdelip shyǵady dep josparlanýda. Sońǵy kúnderi emdelgender sany indet juqtyrǵandar sanynan kóbeıip kele jatyr. Bul - óte jaqsy kórsetkish, koronavırýs ınfeksııasy boıynsha jaǵdaı turaqtalyp keledi degen sóz. Bul - elimizde engizilgen tótenshe jaǵdaı rejıminiń nátıjesi dep aıtýǵa bolady», - dedi Aıjan Esmaǵambetova.
Onyń aıtýynsha, naýryz aıynda aýyrǵandar sanynyń ósýi 150%-dy kórsetse, sońǵy táýlikterde aýrýdyń ósý kórsetkishi 2,3%-dy ǵana kórsetýde.
«Bir apta ishinde bul kórsetkish 5%-dan aspady. Tótenshe jaǵdaı rejıminiń aıaqtalýy karantın sharalary túgel toqtaıdy degen sóz emes. Biz áli de karantın rejımin saqtaýymyz kerek. Ol eldegi epıdemıologııalyq jaǵdaıǵa baılanysty birtindep jeńildetiledi», - dedi ol.