Karantın bolsa da Ramazan aıynda saýapty ister legi toqtap qalǵan joq. Endeshe onlaın tólemdegi «Pitir sadaqasy» men «Aýyzashardy» el-jurt qalaı qabyldaýda?
Qazir qaýipti indetke baılanysty tutynýshylardyń kóbisi onlaın tólemge kóshkeni belgili. Karantın kezinde meshitterge kirýge ruqsat joq bolǵanymen, úıinde duǵa etken jamaǵat «Pitir sadaqasy», «Zeket», «Pidııa» jáne «Aýyzashar» sekildi qaıyrymdylyqty Kaspi Bank, Halyk Bank nemese Qiwi mobıldi qosymshalary arqyly kórsete alady. Máselen, qaıyrymdylyq jasaýǵa nıet etken adam Kaspi Bank qosymshasyndaǵy Qaıyrymdylyq (Blogotvorıtelnost) bólimin tańdap, ózi turatyn aýmaqtaǵy meshitke arnaıy tólem jibere alady. Qazirdiń ózinde Nur-Sultan qalasyna qarasty 13 meshit, sondaı-aq Almaty jáne Almaty oblysynda – 45, Shymkentte – 40, Batys Qazaqstan oblysynda – 62, Soltústik Qazaqstan oblysynda – 53, Shyǵys Qazaqstan oblysynda – 24, Ońtústik Qazaqstan oblysynda 22 meshit osy júıege tirkelip úlgeripti. Sondaı-aq «ZEKET», «Hareket», «Dara», «Qasıetti jol», «Podarı Detıam Jızn» sııaqty qaıyrymdylyq qorlaryna da aqshalaı kómek retinde tólem jibere alasyz.
Sharıǵat boıynsha ár musylmanǵa pitir sadaqasyn berý paryz. Hadıste: «Pitir sadaqasy aýyzdan shyqqan unamsyz sózderden jáne (abaısyzda istep qoıǵan) jaǵymsyz áreketterden tazartýshy ári kedeılerge isher as bolsyn», dep aıtylǵan. Osyǵan baılanysty Almaty oblysy, Uıǵyr aýdanynyń bas ımamy Danııar Qalmaqbaıulymen áńgimelesýdiń sáti tústi. «Asyǵa kútken on eki aıdyń sultany Ramazan aıynda bizdiń aýdan turǵyndarynyń da pitirlerin onlaın tólem arqyly jiberýge múmkindigi bar. Internet arqyly jiberýge múmkindigi joq jandar úshin meshittiń syrtyna jáshik qoıyp qoıǵanbyz. Kúndelikti tártip boıynsha meshitke ımam, kómekshisi jáne azanshy ǵana keledi. Indetten tezirek qutylý úshin Bas múftıimizdiń úndeýine biz de qosylyp, kúnde úzdiksiz hatym Quran oqýdamyz. Múftııattyń tapsyrmasymen jamaǵattyń atynan áleýmettik jaǵdaıy tómen otbasylarǵa, jalǵyzbasty analarǵa 100-den astam azyq-túlik paketteri taratyldy. Saýaby mol izgi aıdy barsha musylman qaýym ıgi isterge jumsaýy tıis! Ramazan aıynda tilegen tilek qabyl bolady deıdi. Shynyn aıtý kerek, jamaǵat meshitti saǵynyp júr, Alla taǵalam sabyr bersin», deıdi D.Qalmaqbaıuly.
Qazir onlaın tapsyryspen aǵaıyn, týys, dos-jaran, múmkindigi shekteýli jandarǵa qaıyrymdylyq retinde aýyzasharlar berip jatqandar kóp. Mysaly, belgili psıholog Quralaı hanym joldasy ekeýi Hantalapai_Nursultan meıramhanasynan onlaın tapsyryspen taǵam aldyryp, oraza tutqan 100 adamǵa jetkizip berip, aýyz ashtyrypty. Osyndaı saýapty isterdiń basy-qasynda júrgen Iftar_kafe meıramhanasynyń ákimshilik jetekshisi Tabıǵat Jumashevamen telefon arqyly tildeskenimizde «Bizdiń meıramhanadaǵy aýyzasharǵa keletin bolsaq, tek online saýda jasaýdamyz. Árıne, bul ádettegi saýdadan sál qıynǵa soǵýda. Degenmen de fırmalyq taǵamdarymyzǵa jeńildikter qarastyrylǵan. Mysaly, 5 túrli káýapqa tapsyrys beretin bolsa, taba nan jáne ózimiz daıyndaǵan 3 lıtrlik kompot, karkade, kısel sýsyndaryn syıǵa tartamyz. Odan da kóp tapsyrys beretin bolsa osy syılyqtarǵa qosa qymyz beriledi. Allaǵa shúkir, aýyzashar taǵamdaryna tapsyrys berýshilerdiń qatary kúnnen kúnge artyp keledi», dedi.
Endeshe Orazada tilegen duǵa-tilekterińiz qabyl bolyp, barsha álem jurty aman bolsyn, aǵaıyn. Jaqsy amaldarymyz kóbeıe bersin.
Aıym BOLATQYZY
NUR-SULTAN