Ekonomıkany turaqtandyrý – basty másele

Degenmen, jahandyq indetke baılanysty daǵdarys tolyq aıaqtaldy deýge áli erterek bolar. Buǵan álem boıynsha indetti juqtyrǵandardyń sany 4 mıllıonnan, Qazaqstan boıynsha 5 myńnan asyp otyrǵandyǵy dálel. Sol sebepti kúndelikti ómirde, jumys ornynda, adamdarmen qarym-qatynasta saqtyq sharalaryn qatań ustanǵan jón ekendigin, ózimizdiń aman-saýlyǵymyzǵa, eń aldymen, ózimiz jaýapty bolýymyz kerek ekendigin Prezıdent Q.Toqaev erekshe atap ótti. 

Karantın talaptaryn jumsartqan birqatar elde qaıtadan indet taralýynyń kúrt órshýi bul máselede salǵyrttyq tanytý men jeke jaýapkershiliktiń deńgeıin tómendetýge bolmaıtynyn kórsetedi. Mysaly, Germanııada 6 mamyrdan bastap karantın sharalaryn qysqartýdyń ekinshi kezeńine ótý arqyly barlyq saýda ortalyqtaryn ashýǵa, buqaralyq jáne kásibı sportqa ruqsat berilip, sán salondary, mýzeı, zoopark­ter jumystary jandandy, mektepter birtindep sabaqtaryn bastaýǵa kóshti. Alaıda vırýsty jańa juqtyrǵandar sany kóptep tirkeletin jaǵdaıda, qaıtadan qatań karantın rejimi federaldy aımaqtarǵa baılanysty engizilýi múmkin ekendigin bılik joqqa shyǵarmaıdy.

Qazaqstandaǵy koronavırýs indeti­niń qazirgi kúıine, áli de halyqtyń densaý­lyǵyna qaýiptiń saqtalýyna baılanysty qa­byldanǵan sheshimder quptarlyq. Atap aıtsaq, oblystar arasyndaǵy kólik qa­ty­nasyna shekteýler, qoǵamdyq kólikter­diń jartylaı júktememen júrýi, jolaýshy­lardyń betperde taǵýy talap etilýi, kóshede toptasyp júrý 3 adamnan aspaýy, mem­le­kettik qyzmetshilerdiń 50 paıyzy qashyq­tan jumys isteýi indettiń ekinshi kezeńiniń bastalmaýyna tosqaýyl bolatyn sharalar.

Budan bólek Memleket basshysynyń sózinde eldegi ekonomıkalyq jaǵdaıdy turaqtandyrýǵa baılanysty óte ózekti máseleler qarastyryldy. Endigi kezekte atalǵan máseleler Ekonomıkalyq ósimdi qalpyna keltirý jónindegi memlekettik komıssııa sheńberinde júzege asyrylatyn bolady.

Ásel NAZARBETOVA,

Prezıdent janyndaǵy QSZI halyqaralyq zertteýler bóliminiń basshysy