Memleket basshysy Qasym-Jomart Toqaev Tótenshe jaǵdaı rejimin qamtamasyz etý jónindegi memlekettik komıssııanyń qorytyndy otyrysynda elimizde tótenshe jaǵdaıdyń aıaqtalǵany týraly habarlady. Bul jańalyqty halyqtyń kútkeni anyq.
Alaıda jaǵany keńge salatyn ýaqyt áli kelgen joq. Indettiń qaıta taralý qaýiptiligi áli de joǵary. Sondyqtan ázirge karantındik sharalardy saqtaı turýymyz kerek. Keıbir elder karantındi jumsartamyz dep aýrý sanyn arttyryp jatyr. Sondyqtan olardyń jaǵdaıynan sabaq alýymyz oryndy dep bilemin.
Jalpy karantın elimizdiń medısına salasyna aýyr júk túsirmeý úshin qajet boldy. Al qazir tótenshe jaǵdaı rejimin toqtatýǵa ne túrtki bolyp otyr? Elde shaǵyn jáne orta bıznes biraz daǵdarysqa ushyraǵandyqtan, olarǵa kómektesý úshin tótenshe jaǵdaıdy alyp tastaý qajettiligi de týyndady. Qatań karantın kezinde strategııalyq iri ónerkásipter anaý aıtqandaı zııan shege qoımady. Tabysynan qaǵylǵan negizinen qyzmet kórsetý salasyndaǵy shaǵyn kásipkerler boldy.
Búgingi kúni Qazaqstanda halyqtyń basym bóligi – ózin ózi jumyspen qamtyǵandar nemese qyzmet kórsetý salasynda tabys taýyp júrgender. Endi olarǵa qoldaý artady. Olarǵa qatysty Memleket basshysy:
– Ekonomıkany nesıeleýge bankterdiń múmkindikterin keńeıtetin qosymsha ýaqytsha prýdensıaldy sharalar keshenin ázirleý kerek. Mıkro ári shaǵyn kásipkerlikke jekeleı nazar aýdarý kerek. Olardyń tolyqqandy standartty banktik ónimderdi paıdalaný múmindikteri tym shektelgen. «Bıznestiń jol kartasy» baǵdarlamasy aıasynda shaǵyn bıznes úshin arnaıy sharalardy qarastyrýdy tapsyramyn, – dedi.
Aldaǵy ýaqytta elimizde orta jáne shaǵyn kásiptiń jaǵdaıy qaıta ońalýǵa Úkimet pen «Atameken» atalǵan baǵytqa qoldaý jasaıtynyna senimdimiz. Jáne bul baǵytty jandandyrýda naqty tapsyrma berilip jatyr.
Osynyń bárin qoryta kelgende, eldegi tótenshe jaǵdaıdy toqtatý týraly sheshim oryndy. Degenmen qazaqstandyqtar áleýmettik saqtyq sharalaryn umytpaýy tıis.
Saparbek JOBAEV,
ekonomıst