Aǵymdaǵy jyldyń aqpan aıynda Jambyl oblysynyń Qordaı aýdanynda jappaı tóbeles oryn alyp, birqatar turǵyn úıler men ózge de nysandarǵa zalal kelgen bolatyn. Búginde sol aýdandaǵy qıraǵan turǵyn úıler men kommersııalyq nysandardy qalpyna keltirý jumystary bastalyp ketti. Alaıda, Hýseın Súleımen, Abdýrashıd Bagıev jáne Ismar Lýtýr sııaqty keıbir jergilikti kásipker turǵyndar úıler men dúkenderdi óz betimen qalpyna keltirýdi uıǵarypty. Sóıtip, olar memleketten osy maqsatqa qarastyrylǵan qarajatty basqa sharýalarǵa jumsaý úshin shyǵyndardy ońtaılandyrýǵa yqpal etýde.
Jýyrda Jambyl oblysynyń ákimi Berdibek Saparbaev Qordaı aýdanyna jumys saparymen barǵanda da jergilikti turǵyndar kórsetilgen kómek pen qoldaýlar úshin el Prezıdenti men jergilikti bılikke alǵys bildirgen bolatyn.
Masanshy aýylyndaǵy jańa mekteptiń qurylysy ótpeli nysan bolyp tabylady. Aǵymdaǵy jyly ol boıynsha 550 mıllıon teńge ıgeriledi. Masanshy aýyldyq okrýgi ardagerler keńesiniń tóraǵasy Dydar Dvýmarovtyń aıtýynsha, búginde 41 kóshe jóndelýde, jańa mektep, sport alańy salynýda eken. Jyl sońyna deıin Masanshy men kórshiles 6 eldimekenge gaz tartylady. Sondaı-aq, aýylda shaǵyn fýtbol alańshasy, kóshe trenajerlary men balalar alańynan turatyn kópfýnksıonaldy sport alańy salynýda. Maýsym aıynyń alǵashqy kúnderinen bastap munda jergilikti balalar men eresekter jattyǵýǵa múmkindik alatyn bolady. Sogndaı-aq, Berdibek Saparbaev nysandy paıdalanýǵa bergennen keıin sport alańyn jaqyn ornalasqan mekteptiń balansyna tapsyrýdy usynǵan edi. Masanshy aýyldyq okrýgine Kúnbatys-1 jáne Kúnbatys-2 shaǵyn aýyldary da kiredi. Kúnbatys-1 eldi mekeninde 200-den astam adam turady. Munda búginde quny 26 mıllıon teńgeni quraıtyn medısınalyq pýnkttiń qurylysy júrgizilýde. Al, Kúnbatys-2 aýylynda 150 oryndyq mektep salynýda. Jumysshylardyń 70 paıyzdan astamyn jergilikti turǵyndar quraıdy. Quny 662,8 mıllıon teńge bolatyn úsh qabatty nysan 25 tamyzǵa deıin aıaqtalady.
Sol sııaqty Qarakemer aýylyn damytýǵa shamamen 1,6 mıllıard teńge bólinbek. Aýyldan sport alańy men dárigerlik ambýlatorııa salynyp, quny 880 mıllıon teńge bolatyn aýyz sý tartý jobasy júzege asyrylýda. Sonymen qatar, 11 kóshege asfalt tósep, 6 kósheni jaryqtandyrý jumystary júrgizilýde. Kezekte turǵan turǵyndar úshin Qonaev kóshesinen eki páterli 10 úıdiń qurylysy júrip jatyr.
Aýdandaǵy Aýqatty aýyldyq okrýginde 19 kósheniń jáne №9 orta mekteptiń kúrdeli jóndeý jumystary bastaldy. Mektep aýlasyna tolyǵymen órnektastar tóselip, kárizder júrgizilip, jyly sanıtarlyq jabdyqtalýda. Jalpy, búginde Qordaı aýdanyndaǵy jaǵdaı turaqty. Qıraǵan nysandar qalpyna keltirilýde.
Jambyl oblysy