- Elimizge belgili jýrnalıst, halqymyzdyń aıaýly uly Beısen Quranbektiń qazasy barshamyzǵa aýyr tıdi. «Aıtýǵa ońaı», «Qareket» baǵdarlamalary arqyly qazaq jýrnalıstıkasynda ózindik qoltańbasyn qaldyrǵan telejúrgizýshi, eldiń muńyn óz muńyndaı kórip, kópke qamqor bolǵan jomart júrekti azamat baqıǵa attandy. Marqumnyń otbasyna, jaqyndaryna qaıǵylaryna ortaqtasyp, kóńil aıtamyz.
Qazaq jýrnalıstıkasy aýyr qaıǵyǵa dýshar boldy. 49 jasqa qaraǵan shaǵynda belgili jýrnalıst Beısen Abaıuly Quranbek dúnıeden ótti. Eldegi BAQ salasynyń damýyna erekshe úles qosqan qarymdy tilshi, aýzy dýaly júrgizýshi, bilikti medıa-menedjerdiń sińirgen eńbegi el esinde. Qıyndyqtan qaıtpaıtyn, otany úshin qyzmet etýge bekingen asyl jannyń beınesi áriptesteriniń jadynda qalady. Aıtýǵa qıyn, qabyldaýǵa sýyq habar bizdiń de qabyrǵamyzdy qaıystyrdy.
Beısen Quranbek ál-Farabı atyndaǵy Qazaq ulttyq ýnıversıtetin bitirgen. Eńbek jolyn respýblıkalyq «Sport» gazetinde tilshi, jaýapty hatshy qyzmetinen bastaǵan. «Rahat», «31 arna», «Habar» arnalarynda, Prezıdent teleradıokesheninde qyzmet atqarǵan. 2007-2012 jyldary Almaty oblystyq «Jetisý» telearnasynyń bas dırektory boldy. 2013-17 jyldary «Qazaqstan» telearnasyndaǵy jalpaq jurtqa tanymal «Aıtýǵa ońaı» áleýmettik-turmystyq tok-shoýynyń júrgizýshisi boldy. 2017 jyldyń qyrkúıek aıynan beri ulttyq arnadaǵy «Qareket» baǵdarlamasyn júrgizdi. 2014 jyldyń qazan aıynda Almaty oblystyq «Jetisý» telearnasynyń bas dırektory bolyp qaıta taǵaıyndaldy.
Ol qaı jerde júrse de óziniń kásibı biliktiligin tanytty. Qalamy júırik, ózindik oıy bar ekenin dáleldedi. О́zekti taqyrypty tap basyp, qoǵamdyq máseleni kótere bildi. Beısen Abaıulynyń týys týǵandary men onyń oqyrmandary men kórermenderine, áriptesterine, jalpy Qazaq eline qaıǵyryp, kóńil aıtamyz! Alla taǵala asyl azamattyń aldynan jarylqasyn, - delingen mınıstrdiń kóńil aıtý hatynda.