Mamyrdyń basynda bastalǵan kıikterdiń tóldeýi aıaqtaldy. Bul týraly Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet Facebook paraqshasynda jazdy.
- Mamyrdyń basynda bastalǵan kıikterdiń tóldeýi kúni keshe aıaqtaldy. Bıylǵy kóktem jaıma-shýaq bolyp, aqbókenderdiń esh ýaıymsyz tóldeýine yńǵaıly boldy. Betpaqdala, oral jáne ústirt popýlıasııalarynda tóldeý ártúrli ýaqytta bastalsa da, birdeı kezeńde aıaqtaldy. Jez kıiktiń qorǵany bolǵan ınspektorlar ár oblysta saqtyq jumystaryn jiti júrgizdi. Dala kezgen «Ohotzooprom» jáne oblystyq aýmaqtyq orman sharýashylyǵy jáne janýarlar dúnıesi ınspeksııalardyń ınspektorlary kúndiz-túni tynym tappaı eńbek etti, - dep jazdy Sáken Dildahmet.
Onyń aıtýynsha, tabıǵat saqshylary jas quralaılardyń ósip-ónýinen bastap, olardyń urpaq jalǵastyrýyna, ári bolashaqtyń amanatyn jetkizý úshin jyl on eki aı qyzmet atqarady.
- Jazdy ótkizip, mızamǵa shyqqanda bıylǵy sanaqty ótkizemiz. Amandyq bolsa, byltyrǵy 334 myń mejeden asýymyz qajet, - delingen jazbada.