Koronavırýs saldarynan toqyraǵan Qytaı ekonomıkasy qaıta qalpyna kelip, AQSh joldarynda kólikter kóbeıgen soń janarmaı tutyný kólemi artyp keledi. Oǵan qosa munaı baǵasynyń ósýi de birqatar úmit syılap otyr. Pandemııadan qatty zardap shekken ekonomıka birte-birte aıaqqa tura bastady.
Devıd HODARI,
Wall Street Journal
AQSh munaıy fıýcherleriniń maýsymdaǵy munaı baǵasy 20 paıyzǵa ósip, 24,56 dollarǵa jetpek. Qazirgi kezeńdegi kelisimshart baǵasy eki ese ulǵaıdy.
Buǵan deıin Soltústik Amerıka munaı qoryn saqtaıtyn qambalardyń tolýynan týǵan daǵdarys osylaısha joıyla bastady. Bıyl 20 sáýirde tarıhta alǵash ret munaı baǵasy nólden túsip ketti. Bul munaı óndirýshilerdiń satyp alýshylarǵa aqy tólegenin bildiredi.
Halyqaralyq energetıka naryǵy baǵalanatyn Brent markaly munaıy 14 paıyzǵa ulǵaıyp, barreline 30,97 dollarǵa jetti.
AQSh pen Eýropanyń birqatar bóliginde shekteýler alynyp, Qytaı qalypty ómirge oralǵandyqtan, benzın men dızeldi otyn sekildi taýarlarǵa suranys artyp keledi. Osy oraıda munaı óndirý kólemi kemidi.
Bıylǵy 1 mamyrda OPEK elderi men «Úlken jıyrmalyqqa» kiretin memleketter óndiris kólemin azaıtý jónindegi kelisim kúshine endi. Baǵanyń quldyraýy AQSh, Norvegııa jáne basqa da elderdiń óndiristi azaıtýǵa ıtermeledi.
OPEK jáne onyń seriktesteri kúndelikti shyǵarylatyn munaı kólemin 9,7 mıllıon barrelge, ıaǵnı 13 paıyzǵa azaıtty. Morgan Stanley ınvestısııalyq banktiń strategııalyq sarapshysy Marteın Retstiń sózine súıensek, basqa memleketter óndiristi 3,4 mıllıon barrelge tómendetti.
Munaı naryǵy daǵdarystan ótkenin bildiretin basqa da belgiler bar. Amerıkanyń shıki munaıy men munaı barreliniń quny arasyndaǵy baǵa ózgerdi.
Sarapshylardyń paıymdaýynsha, ınvestorlar áli de oılana áreket etpek. Retstiń sózine sensek, Úndistan, Japonııa jáne Saýd Arabııasy áli de kólik qozǵalysyn shektep otyr. Bul da munaı baǵasyna áser etedi.
Biraq kóptegen munaı qorlary munaı fıýcherlerimen saýdalasýdy ýaqytsha toqtatty. Bul shıki munaı baǵasyn odan ári qubylmaly ete túsedi. Onyń ústine 20 mamyrda buǵan deıingi satylǵan fıýcherleriniń merzimi aıaqtalady. О́tken aptada amerıkalyq munaıdyń fıýcheri 26,49 dollarǵa jetti. Sondaı-aq munaıdy saqtaý máselesi de tolyqqandy sheshilgen joq.
«WTI markaly munaıdy saqtaý máselesi áli bar. Aldaǵy birneshe apta kóleminde bul túıtkil shıelenise túspek», deıdi Kerolaın Beın. Ol shıkizat óndirýshilerge konsaltıngtik qyzmet kórsetetin Capital Economics kompanııasynyń ekonomısi.
Daıyndaǵan
Abaı ASANKELDIULY,
«Egemen Qazaqstan»