Qıyr qonyp, shet jaılaǵan bir aýylǵa jańadan kórkem minezdi ári bilimdi ımam taǵaıyndalypty. Ol az ýaqyt ishinde turǵyndardyń qurmeti men qoshemetine ıe bolypty.
Ramazan aıy keledi. Aýyl turǵyndary oraza ustaıdy. Jańa ımamdy olar kezektesip aýyzasharǵa shaqyrysady. Sodan bir kúni kezegi kelip, aýyl ustasy da el qatarly ımamdy shaqyrady. Ustanyń áıeli, eriniń «saqtap qoı» dep bergen birshama aqshasyn qonaq bólmedegi shaı ishýge arnalǵan sóreniń ústine qoıyp, dastarqan ázirligimen júrgende ol týraly umytyp ketedi.
Dastarqan daıyn bolyp, qonaqtar asqa otyrady. Aýyz ashylyp, shaı ishiledi. Keıin úı ıesi ımammen birge quptan namazyn óteý úshin meshitke ketedi. Áıeli dastarqandy, úıdi jınap júrip, kenet sóreniń ústine qoıǵan aqsha esine túsedi. Qarasa qoıǵan orynynda joq. Izdeıdi, biraq tappaıdy. Bir ýaqytta eri keledi. Jaǵdaıdy baıandaı kele, «Alla biledi, aqshany ımam aldy, sebebi, bul úıge odan basqa kirgen-shyqqan jan balasy bolǵan joq» dep áıel óz oıyn aıtady.
Muny estigen úı ıesi ımamǵa qatty renjip, ashýlanady. Din adamynyń munysy nesi, atyna laıyq pa dep kóńili qalady. Imamǵa eshteńe demeıdi, biraq barynsha odan alshaq júredi.
Kúnder ótip, kelesi jyly da Ramazan keledi. Ádetinshe, aýyl turǵyndary moldany kezek-kezek úıine shaqyryp aýyzashar beredi. Sóıtip, kezek ótken jyly aqshasyn joǵaltqan úı ıesine keledi. Úı ıesi: – «Hanym, álbette men ımamǵa óte renjýlimin, biraq, pende ǵoı, múmkin bir muqtajdyǵy bolǵan shyǵar, bizge aıtýdan tartynǵan shyǵar, aqshany muqtajdyqpen alǵan shyǵar. Sadaqamyz bolsyn, biz ony bul joly da aýyzasharǵa úıge shaqyraıyq», – deıdi.
Áıeli de solaı oılaıtyndyǵyn aıtyp, ımamdy úıine shaqyrady. Aýyz ashylyp, tamaq jelingennen keıin shaı ústinde úı ıesi: – «Ustaz, bir jyldan beri ózińizge degen salqyn qandylyǵymdy baıqap júrsiz be?» – dep suraıdy. Imam: – «Iá, baıqap júrmin, biraq sebebin áli kúnge deıin túsine alar emespin» – dep jaýap beredi. Úı ıesi: – «Ustaz, ótken jyly sizdi Ramazanda aýyzasharǵa úıge shaqyrǵan edik. Sol aýyzasharda sizdi qonaq etken bólmeniń shaı ishýge arnalǵan sóresiniń ústinde birshama aqsha qalyp qoıǵan edi, keıin tappaı qaldyq. Eger aqshaǵa muqtajdyǵyńyzdyń bar ekendigin bizge aıtsańyz da berer edik qoı. Mine, sol sebepti Sizge renjýlimin» – deıdi.
Bul sózdi estigen ımam egile jylapty. Úı ıesi yńǵaısyzdanyp, aıtqanyna ókinip, sasqalaqtaı bastaǵanda, ımam: – «Qurmetti, baýyrym, men seniń ury etkenińe jylap otyrǵan joqpyn, bir jyldan beri anaý tórde ilýli turǵan qasıetti Quran Kárimdi bir ret te ashyp oqymaǵandyǵyńa jylap otyrmyn. Sebebi, sol keshte sizder bólmede joq kezderińizde terezeden soqqan jel aqshalaryńyzdy jerge ushyryp túsirdi. Men olardy jerden alyp, jınap-búktep ilýli turǵan Qurannyń ishine salyp qoıǵan edim» – degen eken.