Áli jaz mezgili bastala qoıǵan joq. Jaıyqqa shomylýǵa erte, onyń ústine ózen sýy salqyn. Biraq...Atyraýlyq jasóspirimder buǵan mán bermeıtin sekildi. Tipti, ata-analary balalarynyń qaıda, ne istep júrgeninen beıhabar bolyp shyqty. Bul keshe polısııa qyzmetkerleri Jaıyq ózenine shomylyp júrgen on jasóspirimdi anyqtaǵan kezde ańǵaryldy.
– Polısııa qyzmetkerleri tús kezinde Atyraý qalasyndaǵy Kaspıı yqsham aýdany men Turǵyndar qalashyǵy-Avangard shaǵynaýdandary arasynda salynǵan jaıaý kópirdiń tusynda serýendep, Jaıyq ózenine sýǵa shomylyp júrgen onǵa jýyq jasóspirimdi anyqtady. Balalarynyń ózen jaǵalap, qaýipti jaıtty eskermesten, sýǵa túsip júrgeninen beıhabar ata-analar qalalyq polısııa basqarmasyna shaqyrtyldy. Olarǵa qatysty QR Ákimshilik quqyq buzýshylyq týraly Kodeksiniń 364-babymen (Ortaq sý paıdalaný qaǵıdalaryn buzý) hattamalar toltyryldy,- dep habarlady oblystyq polısııa departamentiniń baspasóz qyzmeti.