Polısııa qyzmetkerleri 25 mamyrdan beri «Boryshker» is-sharasyn ótkizip jatyr. Alǵashqy úsh kúnde júrgizýshiler tarapynan 161 quqyq buzýshylyq jasalypty. Soǵan oraı júrgizýshilerge salynǵan 1 mıllıon 200 myń teńgeden astam aıyppul óndirilip otyr.
– «Boryshker» is-sharasy aıyppuldardy tóleýden jaltaryp júrgen júrgizýshilerge qatysty pármendi jumystardy uıymdastyrý maqsatynda qolǵa alyndy. Atalǵan is-shara kezinde Jedel basqarý ortalyǵyndaǵy beınekameralardyń jáne «Avtoýragan» júıesiniń kómegimen qala kóshelerinen 45 kólik toqtatyldy. Bul kólikterdiń júrgizýshileri 276 ret ákimshilik quqyq buzǵan. Keıbireýiniń jol qozǵalysy erejelerin 10-17 ret buzǵany anyqtaldy. Alaıda, olar quqyq buzýshylyq úshin salynǵan 2 mıllıon teńgeden asatyn aıyppuldardy tóleýden jaltaryp kelgen. Tártip saqshylary boryshkerlerdiń kólikterin aıyppul turaǵyna qoıyp, olarmen túsindirý jumystaryn júrgizdi, - dep habarlady departamenttiń baspasóz qyzmeti.