Oblys ákimi Gúlshara Ábdiqalyqovanyń tóraǵalyǵymen oblystyq tótenshe jaǵdaılardyń aldyn alý jáne olardy joıý jónindegi komıssııasynyń kezekti otyrysy ótti. Jıynǵa qala jáne aýdan ákimderi selektorlyq rejımde qatysty. Kún tártibinde sýǵa shomylý maýsymyndaǵy qaýipsizdik sharalary men orman jáne dala órtteri, orman sharýashylyǵy mekemeleriniń materıaldyq-tehnıkalyq jabdyqtalý máseleleri qaraldy.
Birinshi másele boıynsha oblystyq jumyldyrý daıyndyǵy basqarmasynyń basshysy Medet Ýsaın habarlama jasady. Jyl basynan beri sýǵa ketýdiń 9 deregi tirkelgen. Oqys jaǵdaılardyń negizgi sebebi qaýipsizdik erejelerin saqtamaýda bolyp otyr.
О́ńir basshysy 2020 jyldyń sýǵa shomylý maýsymyna deıin kommýnaldyq jaǵajaılar ashýdy jáne Qyzylorda qalasy men Aral, Shıeli aýdandary ákimderine 1 sáýirge deıin Qambash, Hanqoja kólderi men Qyzylorda qalasy aýmaǵyndaǵy Syrdarııa ózeni boıynda ornalasqan jedel sýda qutqarý jasaǵy ǵımaratynyń janyna baqylaý munarasyn ornatýdy tapsyrǵan bolatyn. Alaıda bul másele áli kúnge deıin sheshimin tappaǵan. Osy oraıda óńir basshysy ákimderge eskertý jasady.
Adam ómiriniń qaýipsizdigine bárimiz jaýaptymyz. Osy rette, jaǵajaı ashyp, ony qajetti qutqarý quraldarymen qamtamasyz etý máselesi tikeleı qala jáne aýdan ákimderinen suralatyn bolady. Sizderge osy jumystardy atqarýǵa 1 aı ýaqyt beremin,- dedi oblys ákimi Gúlshara Ábdiqalyqova.
Kún tártibindegi ekinshi másele boıynsha oblystyq tabıǵı resýrstar jáne tabıǵat paıdalanýdy retteý basqarmasynyń basshysy Baýyrjan Shámenov habarlama jasady. 2020 jyldyń 3 naýryzynda «Qyzylorda oblysy aýmaǵynda orman jáne dala órtteriniń aldyn alý jáne joıý jónindegi is-sharalar jospary» bekitilgen. Sonymen qatar, órtke qarsy qyzmeti joq eldi mekenderde 1971 adamnan turatyn 172 erikti qurylym jasaqtalǵan. Olar 7 órt sóndirý jáne 373 beıimdelgen tehnıkamen jabdyqtalǵan.
Oblys boıynsha jalpy jer kólemi 22,6 mln gektar. Onyń 6,5 mln gektary memlekettik orman qorynyń jeri. Jyl basynan memlekettik orman qorynda 35 órt oqıǵasy oryn alyp, bul kórsetkish ótken jyldyń osy kezeńimen salystyrǵanda 35 esege kóbeıgenin kórsetedi. Keltirilgen zalal kólemi 9 mln teńgeni quraǵan.
О́ńir basshysy orman sharýashylyǵy mekemeleriniń materıaldyq-tehnıkalyq bazasyn nyǵaıtý jóninde 3 jylǵa arnalǵan jol kartasyn bir apta merzimde bekitýdi tapsyrdy.