Elorda saıabaqtarynda, qoǵamdyq oryndarda, áleýmettik nysandar, bazarlar, saýda ortalyqtary, aıaldamalar men avtobýstarda, balalar alańdarynda jáne basqa da adamdar kóp jınalatyn jerlerde dezınfeksııa jalǵasýda. Qalada 20 mıllıon sharshy metrden astam aýmaq dezınfeksııalandy. Dezınfeksııalaý jaıaý jáne arnaıy mashınalardyń kómegimen júrgiziledi. Bul týraly elorda ákimdiginiń baspasóz qyzmeti habarlady.
«Covid-19 taralýyna jol bermeý úshin dezınfeksııa jalǵasýda. Sondaı-aq buǵan áskerı qyzmetkerler, Qorǵanys mınıstrliginiń qyzmetkerleri de jumyldyrylǵan. Osynyń bári qalalyqtardyń qaýipsizdigi úshin jasalady. Turǵyndarǵa karantınniń jeńildetilgen rejımine baılanysty qoǵamdyq oryndarǵa, saıabaqtar men baqtarǵa barýǵa ruqsat etilgen. Biz atalǵan oryndardy muqııat dezınfeksııalaımyz. Turǵyndardy barlyq sanıtarlyq erejelerdi saqtaýǵa shaqyramyn. О́zińizdi qorǵaı otyryp, basqalardy da qorǵaı alasyz», – dep atap ótti Qorshaǵan ortany qorǵaý jáne tabıǵatty paıdalaný basqarmasy basshysynyń orynbasary Almaz Rysalıev.
Elorda turǵyndary qatań sanıtarlyq normalardy saqtaýy qajet: maska kıip júrý, qashyqtyq saqtaý, antıseptık paıdalaný. Sanıtarlyq normalar buzylǵan jaǵdaıda qala qatań karantın rejımine qaıta aýysýy múmkin.