Ordabasy aýdanynyń polıseıleri 10-nan astam mal urlyǵyn ashyp, eki qylmystyq topty ustady, dep habarlady IIM baspasóz qyzmeti.
Ordabasy aýdanynda jyl basynan beri 18 mal urlyǵy tirkelip, onyń 12 jaıty ashyldy. Ordabasy aýdandyq polısııa bólimshesiniń krımınaldyq polısııa jáne jergilikti polısııa qyzmetkerleriniń jumys kúshimen mal urlyǵymen aınalysqan eki qylmystyq top ustaldy.
Qylmystyq toptyń bireýinde tórt adam bolǵan, olar aýdanǵa qarasty aýyldardyń birinen qoı urlaýmen aınalysqan. Ekinshi qylmystyq toptyń quramynda da tórt jergilikti turǵyn bar. Olardyń Ordabasy aýdany Amangeldi aýylynan urlanǵan 47 bas qoı urlyǵyna qatysy bary anyqtaldy.
QR Qylmystyq kodeksiniń 188-baby (urlyq) baby boıynsha sotqa deıingi tergeý amaldary júrgizilgennen keıin mal urlyǵyna qatysty jınalǵan materıaldar sotqa jiberildi. Urlanǵan qoılardyń basym bóligi zańdy ıelerine qaıtaryldy.
Ordabasy aýdandyq polısııa bólimshesiniń jergilikti polısııa qyzmetiniń basshysy Baqytjan Mahambetov atap ótkendeı, mal urlyǵynyń oryn alýyna negizinen úı malyn qaraýsyz qaldyratyn aýyl turǵyndarynyń beıqamdyǵy sebep bolyp tabylady. Odan bólek, tórt-túligi joǵalǵan sátte birden polısııaǵa habarlamaı, óz betinshe izdep ýaqyt ozdyrady. Bul áreket mal urlyǵynyń ashylýyna keri yqpal etip jatady.
Qazirgi ýaqytta Ordabasy aýdandyq polısııa bólimshesiniń polısııa qyzmetkerleri tarapynan mal urlyǵy jaıttarynyń aldyn alý jáne azaıtý, jaıylymda qaraýsyz qalǵan maldardy anyqtaý boıynsha turaqty jumys júrgizilip jatyr. Tártip saqshylary qora-jaılardy jáne jaıylymdardy aralap, turǵyndarmen jıyndar ótkizýde, mal ıeleri men baqtashylar arasynda ujymdyq jaıylymǵa úsh jaqty kelisim jasaý, sondaı-aq úı janýaryn der kezinde syrǵalaý jáne en-tańbalaryn saldyrý týraly túsindirý jumystaryn júrgizip jatyr.
Mysaly, Ordabasy APB JPQ qyzmetkerleri aýlasynda usaq mal baǵyp, ósirýmen aınalysatyn Temirlan aýyly turǵynynyń úıine bardy. Polısııa qyzmetkerleri úı ıesine qoılardy tańbalaýdan bastap, qora-jaıyn senimdi qulyptarmen nyǵaıtýǵa jáne aýlasyna múmkindiginshe beınebaqylaýkameralaryn ornatýǵa áreket jasap, óz múlikterin saqtaý boıynsha osyndaı tıimdi sharalar qabyldaý qajettigin túsindirdi.
Ordabasy aýdanynyń tártip saqshylary mal urlyǵynyń aldyn alý jáne jolyn kesý maqsatynda jaıylymdarda qaraýsyz qalǵan maldardy anyqtaý boıynsha reıdtik is-sharalar júrgizýde jáne mundaı jaıttar anyqtalǵan jaǵdaıda tártip buzýshylar QR ÁQBtK-niń 408-babyna sáıkes (aýyl sharýashylyǵy janýarlaryn jaıý erejelerin, ıtter men mysyqtardy asyraý jáne serýendetý erejelerin, qańǵybas ıtter men mysyqtardy aýlaý jáne joıý qaǵıdalaryn buzý) ákimshilik jaýapkershilikke tartylatynyn eskertedi.
Mal urlanǵan nemese joǵalǵan jaǵdaıda tez arada “102” telefony arqyly polısııaǵa habarlaý qajet.