Parıjde Qazaqstan Respýblıkasynyń Syrtqy ister mınıstriniń orynbasary Arman Isetov pen Fransııanyń Eýropa jáne Syrtqy ister mınıstrligi Kontınenttik Eýropa departamentiniń dırektory Brıs Rokfeıdiń qatysýymen qazaq-fransýz saıası konsýltasııalarynyń 11-shi raýndy ótti, dep habarlaıdy Egemen.kz.
Kelissózder barysynda taraptar Qazaqstan men Fransııa arasyndaǵy strategııalyq seriktestikti odan ári nyǵaıtý máseleleriniń keń aýqymyn, sondaı-aq kópjaqty ózara is-qımyldyń ózekti baǵyttaryn talqylady.
A.Isetov Qazaqstan men Fransııa arasyndaǵy saıası dıalogtyń turaqty ári senimdi sıpatqa ıe ekenin jáne onyń memleketter basshylary deńgeıindegi júıeli baılanystar arqyly qoldaý tabýda ekenin atap ótti.
Ekonomıkalyq baǵyttaǵy máselelerdi talqylaý barysynda A.Isetov Fransııanyń Qazaqstannyń jetekshi eýropalyq saýda-ınvestısııalyq seriktesteriniń biri retindegi rólin atap ótti. Fransııanyń Qazaqstan ekonomıkasyna salǵan jalpy ınvestısııa kólemi shamamen 21 mlrd dollardy quraıdy. Fransýz kompanııalary energetıka, aýyl sharýashylyǵy, kólik ınfraqurylymy, ónerkásip, ornyqty damý jáne densaýlyq saqtaý syndy Qazaqstan úshin basym salalardyń damýyna eleýli úles qosyp keledi.
Gýmanıtarlyq salada bilim berý, ǵylym jáne mádenıet salalaryndaǵy yntymaqtastyqty damytýǵa ózara múddelilik rastaldy.
Taraptar kópjaqty kún tártibindegi halyqaralyq beıbitshilik pen qaýipsizdikti nyǵaıtý máselelerine qatysty ustanymdardyń sáıkestigin, sondaı-aq halyqaralyq quqyq pen BUU Jarǵysynyń qaǵıdattaryna beıildilikti atap ótti.
Ekologııalyq jáne klımattyq kún tártibi aıasynda qazaq tarapy 2026 jylǵy 22–24 sáýir aralyǵynda Qazaqstanda ótetin BUU-nyń О́ńirlik ekologııalyq sammıtine qatysty fransýzdyq seriktesterdiń belsendi ustanym bilidiretindikterine úmit bildirdi. Fransýz delegasııasynyń qatysýy 2024 jylǵy jeltoqsanda Er-Rııad qalasynda Qazaqstan men Fransııa prezıdentteriniń tóraǵalyǵymen ótken One Water Summit bastamasynyń logıkalyq jalǵasy bolmaq.
О́z kezeginde B.Rokfeı Fransııanyń Qazaqstanmen jan-jaqty yntymaqtastyqty odan ári damytýǵa múddeliligin taǵy da rastaı otyryp, memleket basshylary arasynda qol jetkizilgen ýaǵdalastyqtardy praktıkalyq turǵyda iske asyrýdyń mańyzdylyǵyna nazar aýdardy.
Sonymen qatar A.Isetov Parıjge sapary aıasynda Fransııanyń Eýropa jáne syrtqy ister mınıstrligi Saıası jáne qaýipsizdik máseleleri jónindegi bas dırektory Frederık Mondolonımen kezdesti. Onyń barysynda ekijaqty, óńirlik jáne halyqaralyq ózekti máseleler talqylandy.