Buıyrsa, aldaǵy birer aptada Taldyqorǵan qalasyndaǵy «Qaratal» shaǵyn aýdany aýmaǵynda Stýdentter úıiniń esigi aıqara ashylmaq. Qazir burynǵy «saqaldy» qurylysqa aınalǵan qonaqúı ǵımaraty tolyqtaı qaıta jańǵyrtylyp, keremet kampýsqa aınaldy. Jańa nysannyń qoldanysqa berilýi qalada bilim alatyn 288 stýdenttiń jataqhana máselesin birden sheshpek.
Jalpy, Almaty oblysynda stýdent jastardy jataqhanamen qamtý isi Elbasynyń «5 áleýmettik bastama» baǵdarlamasy jarııa bolǵannan keıin qolǵa alynǵan bolatyn. Shyn mánisinde oblystaǵy oqý oryndarynda stýdentterdiń jatyn orny ótkir máselege aınalǵany jasyryn emes edi. Máselen, aımaqtaǵy Jetisý ýnıversıtetiniń kúndizgi bóliminde 3 myńnan astam stýdent oqysa, onyń bes júzge jýyǵynyń ǵana jataqhanada turýǵa múmkindigi bar eken. Ýnıversıtettiń 2 jataqhanasy bolǵanymen, oryn sany shekteýli-tin. Al Taldyqorǵan, Talǵar qalalary men Qaratal aýdanyndaǵy kásiptik bilim beretin arnaýly oqý oryndarynyń bilimgerleri de jatyn oryn tapshylyǵyn áli de sezinýde. Esesine, oblys bıligi de qol qýsyryp otyrǵan joq. Jastardy turǵyn jaımen qamtýǵa bilek sybana kirisip ketti. Bıyl oblysta jalpy sany 968 oryndyq 10 jataqhananyń qurylysy júrip jatyr. Onyń segizi kolledj oqýshylaryna arnalǵan eken. Al Taldyqorǵanda ashylatyn stýdentter kampýsy Jetisý ýnıversıtetiniń ıeligine beriledi.
Endi Qaratal ózeniniń jaǵalaýyna jaqyn turǵan, zamanaýı úlgide jańǵyrǵan 9 qabatty eńseli nysan tek jatyn orny ǵana emes, jastardyń jeke qalashyǵyna aınalmaq. Munda 96 bólme jasaý, jabdyǵymen daıyn tur. Ǵımarat ishinde jastar talǵamynan shyǵatyn kitaphana, klýb, kafe, shaǵyn kıno-teatr, kompıýter ortalyǵy jáne bar. Al kampýs mańynda sport alańdary men serýendeýge arnalǵan gúlzar, sýburqaq ornalasqan.
– «Bolashaq – jastardiki» degendi biz tek sóz júzinde ǵana aıtpaýymyz kerek. Jas urpaq memlekettiń qamqorlyǵyn sezinýi tıis. Ásirese joǵary bilim alyp júrgen jastardyń alańsyz oqýy úshin qoldan kelgen ıgilikti jasaý bizdiń paryzymyz. Elbasy Nursultan Nazarbaev «5 áleýmettik bastama» týraly másele kótergende bizdiń aldymyzǵa osyndaı mindet qoıdy. Jastardyń erteń elge qaltqysyz qyzmet etýi úshin, otan aldyndaǵy paryz ben qaryzdy árkez salmaqtaı bilý úshin olarǵa tıisti qoldaý men qamqorlyq kórsetýdi Prezıdent Qasym-Jomart Toqaev ta kún tártibinen túsirgen emes. Osy maqsat boıynsha Jetisýdaǵy stýdent jastardyń jaǵdaıyna kóńil bólýdi únemi jalǵastyryp kelemiz. Sonyń biri jataqhana máselesin der kezinde sheship, jastardy baspanamen qamtý jaıy. Taldyqorǵan qalasynan ashylatyn Stýdentter úıiniń qurylysyna basa nazar aýdaryp, barlyq talapqa saı bolýyn únemi nazarda ustap otyrdym. Bul jerde tek jatyn oryn ǵana emes, jastardyń ómirine qajetti zamanǵa laıyq jaǵdaı jasaýdy maqsat ettik, – deıdi oblys ákimi Amandyq Batalov óz oıymen bóliskende.
Jastar demekshi, Jetisýda jańa býynnyń jaǵdaıyna erekshe kóńil bólinip otyr. Ásirese jastardy jumyspen qamtý isine basty nazarda tur. Máselen, «Jumyspen qamtýdyń jol kartasy-2020» baǵdarlamasy boıynsha eńbek naryǵyndaǵy suranysty retteý úshin aımaqtaǵy turǵyndardyń tizimi jasalǵan bolatyn. Anyqtalǵan 13 334 adamnyń qatarynda otyzǵa deıingi 3 228 jumyssyz jas bar eken. Qazir bul jastardy jumyspen qamtý birinshi kezekte júzege asyp jatyr.