Túrkistan oblysyna Armenııadan 531 kólik ákelingen. Onyń 330-y jańadan shyqqan qaýlyǵa sáıkes tirkeýge jatady. Búginde oblys boıynsha 120-dan astam kólik tirkelip, sary nómir alǵan, 10 kún ishinde 300-ge jýyq turǵynǵa keńes berilipti, - dep jazady Egemen.kz
Túrkistan qalasynyń Mamandandyrylǵan halyqqa qyzmet kórsetý ortalyǵynda oblystyq Polısııa departamenti Ákimshilik polısııa basqarmasynyń bastyǵy Almashan Tastanbekov turǵyndarǵa kólikterdi tirkeý boıynsha túsindirme jumystaryn júrgizdi. Odan bólek onlaın rejımde, Polısııa departamentiniń áleýmettik paraqshalarynda tikeleı efır arqyly jeli qoldanýshylarynyń da suraqtaryna naqty jaýaptar berdi.
"Tirkeý boıynsha jergilikti halyq tarapynan kóp qoıylatyn suraqtardyń biri - tirkep bolǵan soń, taǵy da baj salyqtary alynady ma? Árıne, joq. Tek bir ret tirkeseńiz boldy. Ol úshin úsh tólem jasalady. Tólemniń jalpy somasy 11 myń 946 teńgeni quraıdy. Armenııalyq kólikti 2020 jyldyń 1 qyrkúıegine deıin tirkeýge bolatynyn eskerte keteıin. Tirkeý Armenııa Respýblıkasynyń ýákiletti organy bergen tirkeý qujattarynda ıesi retinde kórsetilmegen tulǵalarǵa júzege asyrylmaıdy. Sonymen qatar, bul kólikti ózge adamnyń atyna aýdara almaısyz. Armenııadan ákelingen kólikti tirkeý erejelerin túsindirý úshin Mamandandyrylǵan halyqqa qyzmet kórsetý ortalyǵynda Call-ortalyǵy kún saıyn saǵat 09:00-den 19:00-ge jumys isteıdi", deıdi A.Tastanbekov.
Túrkistan oblysy