Ekinshi dúnıe júzilik soǵys jyldarynda Smolensk túbinde qaza tapqan О́mirzaq Qazanqapovtyń súıegi arnaıy bort arqyly áýeli Reseıge, Reseıden jaýyngerdiń týǵan jeri – Semeı qalasyna jetkizilip, qaıta jerlendi. Týystaryna onyń jeke zattaryn da tabys etipti, - dep jazady Egemen.kz
Eske alý rásimi Semeı garnızonynyń ofıserler úıinde ótti. Sharaǵa "Shyǵys" óńirlik qolbasshylyǵy áskerleri basshylyǵy, qalalyq ákimdik pen qalalyq soǵys jáne eńbek ardagerleri keńesiniń ókilderi jáne jaýyngerdiń týystary qatysty.
О́mirzaq Qazanqapov 120-shy jeke atqyshtar brıgadasynyń quramynda Rjev-Sychev operasııasyna qatysqan kezde 1942 jyldyń 14 tamyzynda qaza tapqan. 78 jyldan keıin týystary onyń qaza tapqan jerin anyqtapty. Jaýyngerdiń súıekterin "Poısk" Máskeý qoǵamdyq uıymynyń "Kobalt" izdeý jasaǵy Smolensk oblysy Temkın aýdanynyń aýmaǵynan tapqan kórinedi.
Izdeý jasaǵy sarbazdyń týǵan-týystaryn uzaq ýaqyt izdegen eken. Nátıjesinde Semeı men Pavlodarda turatyn shóbereleri Omarǵalı Madııar men Lázzat Qazanqapovany taýyp, "Kobalt" izdestirý jasaǵynyń komandıri sarbazdyń súıekterimen birge týystaryna onyń jeke zattaryn da tabys etipti.
Atap aıtqanda, kaska, saperlik kúrek, sabyn salǵysh, saptyaıaq, medalon, ramkadaǵy japsyrma, tarıhı anyqtama jáne qujattary bar medal. "Biz soǵystan qaıtyp oralmaǵan О́mirzaq Qazanqapovtyń súıeginiń týǵan jerine jetkizilgenine qýanyshtymyz. Soǵys batyrlaryn máńgi este saqtaý úshin tynymsyz izdeý jumystaryn júrgizýge belsendi qatysqan barlyq azamattarǵa alǵys aıtamyn" deıdi general-maıor Asan Júsipov.
SEMEI