Donald Tramp osy onjyldyqtyń sońyna deıin Arktıka men Antarktıka aımaqtarynda AQSh-tyń belsendiligin arttyrý úshin jańa muzjarǵysh kemeler men arnaıy bazalardy jasaqtaý týraly tapsyrma berdi. Muz erı bastaǵannan beri bul jaqtyń tabıǵı resýrsyna kóz tikken Reseı men Qytaıǵa endi AQSh básekeles bolmaq.
«Arktıka men Antarktıkada AQSh-tyń ulttyq múddesin qorǵaý» dep atalatyn qujatqa sáıkes prezıdent ákimshiligi 60 kún ishinde jańa jospar ázirleýi kerek. Onda 2029 jylǵa deıin úsh iri muzjarǵysh keme jasaý men AQSh pen ózge el aýmaǵynda ornalasatyn 4 bazanyń qurylysyna qatysty usynystar bolýy qajet.
Qazir AQSh-ta bir iri jáne bir ortasha muzjarǵysh keme bar. Al Reseıde osyndaı kemeniń 40 danasy bar. Odan ózge Fınlıandııada 7, Kanada men Shvesııada 6 muzjarǵysh kemeden bar eken.
Reseıdiń Arktıkaǵa qyzyǵýshylyǵy aıtpasa da belgili, shekaralas aımaq retinde ondaǵy tabıǵı resýrsty óndirý úshin kórshiles el áldeqashan qamdanǵan. Bul jarysqa shekara boıynsha qatysy joq Qytaı da qosylǵan edi.
D.Tramptyń memorandýmynda jańa muzjarǵysh flot «ulttyq jáne ekonomıkalyq qaýipsizdik» maqsatynda qoldanylady delingen. Onyń ishine tabıǵı resýrsty barlaý men óndirý, sýasty kabelderin tóseý kiredi. Jańa teńiz joldary men Arktıkadaǵy munaı-gaz resýrstaryna talastyń qorshaǵan ortaǵa keri áseri jaıly da alańdaýshylyq az emes.