Keshe kórshimiz Qyrǵyzstanda bolǵan qandy jaǵdaı – búlikshilik bizdi alańdatyp otyr. Qyrǵyz elindegi mundaı oqıǵa birinshi ret emes, ekinshi ret bolyp otyr. Alaıda kim utty? Qıraǵan taǵy da jas memleket. Árbir búlikshilik Qyrǵyzstandy odan ári ondaǵan jyldarǵa keri ketiredi. Buǵan osyndaı alaýyzdyq zardabynan áli de es jııa almaı otyrǵan Ýkraınany mysal etsek te jetip jatyr. Búlik arqyly bılikke kelgen eshbir ókimet halyqtyń jaǵdaıyn jaqsartqan emes, kerisinshe, ol burynǵy jetistikterinen de aıyrylýyna ákelip soqtyrǵan. О́z otandastarynyń qolymen álsiregen jas memleket kim kóringenniń oıynshyǵyna, syrtqy alpaýyt memleketterdiń bodanyna aınalary sózsiz. Sondyqtan musylman balasy qandaı da bir múshkil máseleni sheshýde qaqtyǵys pen búlik jolyn emes, tatýlyq pen kelisim, túsinistik, kelissóz jolyn tańdaýy tıis.
Musylman úshin ımannan keıingi eń úlken nyǵmet – tynyshtyq nyǵmeti. Qasıetti Quranda “Baqara” súresinde:
“Búlik shyǵarý – kisi óltirýden de aýyr kúná” delingen. Endeshe, eldegi, dindegi tynyshtyqty saqtaý árkimniń mindeti. Basshyǵa baǵyný máselesi – musylmandardyń, paıǵambar jolymen júretin musylmandardyń eń negizgi máseleleriniń biri. Quranda:
“Eı, ıman keltirgender, Allaǵa baǵynyńdar, Elshige baǵynyńdar jáne aralaryńyzdan bolǵan basshylarǵa boıusynyńyzdar”, – delingen. Bul aıatta Alla taǵala bizge О́zine baǵynýdy, Paıǵambarǵa (hazreti Muhammedke (s.ǵ.s.) jáne aramyzdan shyqqan basshylarǵa baǵyný kerek ekenin ashyq buıyryp tur.
Sondyqtan halqymyz kórshi elde bolyp jatqan jaǵdaıdan ǵıbrat alyp, tynyshtyq pen tatýlyqty, beıbitshilikti árdaıym qaperde ustaýy lázim.
Al kórshimizdiń tezirek órkenıetti elder jolyna túsýin qalaımyz.