Olar Jambyl oblysynda ornalasqan áskerı bólimderde qyzmet etedi. Bul týraly Nur-Sultan ákimdiginiń resmı saıtyna silteme jasaı otyryp Egemen.kz habarlaıdy.
Búgin Nur-Sultan qalasynyń jıyn pýnktindegi jas sarbazdar Qazaqstan Respýblıkasy Qarýly Kúshteri qataryna attandy. Sarbazdar áskerı ant qabyldaǵannan keıin Jambyl oblysyndaǵy áskerı bólimderde qyzmet atqarady.
"Qarýly kúshterimiz ozyq tehnologııalar jáne zamanaýı tehnıkalarmen keńinen jabdyqtalýda. Sol sebepti áskerimizdiń qataryn jas sarbazdarmen tolyqtyrýdy sapaly júrgizýge asa kóńil bólinýde", deıdi Nur-Sultan qalasy qorǵanys isteri jónindegi departamenti bastyǵynyń orynbasary Erbolat Júsipov.
"Bıyl Prezıdent Q.K. Toqaevtyń Jarlyǵy boıynsha kóktemgi áskerge shaqyrý naýqanynyń ótkizilý ýaqyty uzartylyp, azamattardy áskerge jóneltý merzimi tamyz aıyna deıin sozylatyn bolady. Naýryz-mamyr aralyǵyndaǵy bolǵan eldegi karantın sharalary ýaqytynda merzimdi áskerı qyzmetke shaqyrý ýaqytsha toqtatylyp, mamyr aıynyń aıaǵynda qaıta bastaldy. Mamyr-maýsym aılarynda Qazaqstan Respýblıkasynyń Ulttyq qaýipsizdik qyzmetiniń Shekara áskerleri men Ulttyq Ulan áskerı bólimderin jas sarbazdarmen tolyqtyrý josparly túrde oryndaldy", deıdi E.Júsipov.
Onyń aıtýynsha, áskerı bólim komandırlerinen elordalyq sarbazdardyń úzdik qyzmetteri men eldiń qorǵanys qabilettiligine qosyp otyrǵan eńbekteri úshin alǵystar da jıi kelip turady.
Sondaı-aq E.Júsipov: "Shilde aıynan bastap Qazaqstan Respýblıkasy Qarýly Kúshteri áskerı bólimderinde qyzmetin aıaqtaǵan sarbazdardyń orynyna jas tolymdy jónelte bastadyq. Shaqyrylatyn jastarymyz Qapshaǵaı qalasyndaǵy desanttyq-shabýyldaýshy áskerler jáne Aqtaý qalasyndaǵy teńiz jaıaý áskeri áskerı bólimderi sekildi elıtalyq bólimderge barady. Sonymen birge mehanıkalandyrylǵan brıgadalar men Áýe qorǵanysy kúshteri bólimderinde 18 ben 27 jas aralyǵyndaǵy jastarmen tolyqtyramyz", dedi ol.