Qazaqstan Respýblıkasynyń Densaýlyq saqtaý mınıstri Alekseı Soı Koreıa Respýblıkasynyń Qazaqstandaǵy Tótenshe jáne ókiletti elshisi Ký Hong-Sok myrzamen onlaın-keńes ótkizdi.
Kezdesý barysynda taraptar eki eldegi epıdemııalyq jaǵdaıdy, pandemııanyń damý erekshelikterin jáne koronavırýs juqtyrǵan pasıentterge medısınalyq kómek kórsetý, Qazaqstan men Koreıanyń yntymaqtastyǵyna qatysty ózekti máselelerdi, onyń ishinde densaýlyq saqtaý, medısınalyq bilim jáne ǵylym salasyndaǵy tájirıbe men bilim almasýdy talqylady.
Koreı tarapy COVID-19-ǵa qarsy kúrestegi tájirıbesimen jáne ınfeksııalyq aýrýlardyń bolashaqta órship ketýine jol bermeý úshin densaýlyq saqtaý júıesin nyǵaıtý boıynsha sharalarmen bólisti.
A.Soıdyń aıtýynsha, halyqaralyq yntymaqtastyq pen ózara qoldaý COVID-19-ǵa qarsy kúreste úlken mańyzǵa ıe. Koreıanyń koronavırýspen kúreste tájirıbesi mol, sondyqtan yntymaqtastyq pandemııaǵa baılanysty týyndaǵan birqatar problemany sheshýge, ásirese COVID-19-dy baqylaý isinde bilim men ozyq tájirıbelerdi almasýǵa kómektesedi.
Kezdesý qorytyndysy boıynsha densaýlyq saqtaý salasyndaǵy Qazaqstan-Koreıa yntymaqtastyǵyn odan ári damytý, atap aıtqanda COVID-19 boıynsha ádisnama, jaǵdaıdy boljaý, modeldeý jáne t.b. boıynsha onlaın rejimde mamandardy oqytý semınarlaryn ótkizý jónindegi ýaǵdalastyqqa qol jetkizildi. Sondaı-aq taraptar ekijaqty yntymaqtastyqty qysqa merzimdi, orta merzimdi jáne uzaq merzimdi perspektıvalardy strategııalyq damytý týraly sheshim qabyldady. Bul ózara tıimdi áriptestikke serpin beredi.