"Samuryq-Qazyna" UÁQ" AQ aýyr ekonomıkalyq jaǵdaıdaǵy qazaqstandyq kásiporyndarǵa qoldaý kórsetedi. Bul týraly onlaın-brıfıng barysynda qordyń basqarma tóraǵasynyń orynbasary Álisher Pirmetov málimdedi, - dep habarlaıdy Egemen.kz
Qoldaý kórsetý - eki baǵdarlamany, jumys istep turǵan kásiporyndardy qoldaý baǵdarlamasyn jáne ımport almastyrý baǵdarlamasyn júzege asyrý arqyly júrgiziledi.
A.Pirmetovtyń aıtýynsha, aǵymdaǵy jyldyń maýsym aıynda ótken Qordy basqarý Keńesiniń otyrysynda Keńes jáne onyń tóraǵasy qazaqstandyq kásiporyndardy qoldaýdyń jańa baǵdarlamasyn qoldady.
Baǵdarlama "Samuryq-Qazyna" kompanııalar tobynyń óz ónimderin ótkizýmen baılanysty problemalary bar kásiporyndarmen tikeleı sharttar jasasýdy kózdeıdi. Álisher Pirmetovtyń aıtýynsha, bul kompanııalar tobyna qajetti taýarlardy satyp alýǵa, al kásiporyndarǵa óndiristik prosesti toqtatpaýǵa jáne jumys oryndaryn saqtaýǵa múmkindik beredi.
Jumys istep turǵan kásiporyndardy qoldaý baǵdarlamasynyń nátıjeleri boıynsha 38 óndirýshini qamtyǵan 28,3 mlrd.teńge somasyna 47 joba qaraldy. Kásiporyndardyń josparlanǵan júktemesi orta eseppen 35% - dan 85% - ǵa deıin ulǵaıady, toqtap turǵan 2000 jumys orny qalpyna keltirilip, 800 jańa jumys orny qurylady. Sonymen qatar, atalǵan artyqshylyqtar men paıdalardan basqa, óndiristik júktemeni arttyrý esebinen bıýdjetke 6 mlrd.teńgege jýyq salyq túsedi.
"Jańa tásilderdi engizý jumys istep turǵan kásiporyndardy qoldaýdyń naqty tetigi bola otyryp, jumys oryndaryn saqtap qana qoımaı bıýdjetke qosymsha salyq túsimderin qamtamasyz etetin jańa óndirister qurýǵa múmkindik beredi.Qor otandyq taýar óndirýshilerdi qoldaý boıynsha júıeli jumysty jalǵastyrýǵa nıetti. Mundaı júıelik sharalar Qazaqstan ekonomıkasyna daǵdarys jaǵdaıynan taýarlyq naryq konıýnktýrasyna táýeldi bolmaı, jańa áleýetpen shyǵýǵa kómektesedi", - dedi Álisher Pirmetov.
Álisher Pirmetov sondaı-aq 2019 jyly iske qosylǵan ımport almastyrý baǵdarlamasy týraly eske saldy, onyń aıasynda ımport almastyrýǵa baǵyttalǵan jańa óndiristerdi naqty qurýǵa baǵyttalǵan jańa bastamalardy qoldaý úshin offteık kelisimsharttarynyń mehanızmi iske asyrylýda. О́z kezeginde, Qor kompanııalar toby óndirýshilerge olardyń ónimderin satyp alýǵa kepildik beredi.
2018-2020 jyldar qorytyndylary boıynsha qordyń kompanııalar toby 37 offteık-shart jasady, ınvestısııa kólemi 218 mlrd teńgeni qurady, 2000 jańa jumys orny quryldy jáne kásiporyndar 11,5 mlrd teńge salyq tóledi.
Álisher Pırmetov kásipkerlermen jáne taýar óndirýshilermen baılanys úshin arnaıy qurylǵan https://svoyzavod.kz/ veb-saıtyn usyndy, munda ımportqa almastyrýǵa arnalǵan taýarlar pýlyna bas tartý týraly kelisim jasasýǵa nemese taýarlar pýlyna qosýǵa ótinish berýge bolady.
Esterińizge sala keteıik, "Samuryq-Qazyna" qory 2020 jyldy kásipkerlikti qoldaý jyly dep jarııalady.