Oral qalasynda Kóktem shaǵynaýdanyndaǵy Murat Móńkeuly kóshesinde kópqabatty úılerdiń biriniń aýlasynda oınap júrgen 6 jasar qyzdy bóten er adam áldeqaıda alyp ketpek bolǵanda qolǵa tústi.
Oqıǵa 2 tamyz kúni qarańǵy túse, keshki saǵat 21.30.-darda bolǵan. M.Móńkeuly kóshesindegi 113 úıdiń aldynda oınap júrgen balalarǵa jaqyndaǵan er adam kishkentaı qyzdy belgisiz baǵytqa alyp ketpek bolǵan. Kópqabatty úıdiń kireberisinde ornatylǵan baqylaý kamerasyna túsken beınejazbaǵa qaraǵanda, qyzdy sol jerdegi kórshiler qutqaryp qalǵan.
Batys Qazaqstan oblystyq polısııa departamentiniń baspasóz qyzmeti taratqan aqparatqa qaraǵanda, qyzdyń anasynyń shaǵymy Zachagansk polısııa bóliminde tirkelgen. Kúdikti er adam anyqtalyp, qamaýǵa alynǵan. 1965 jylǵy er adam «orta dárejede» mas bolǵan.
Qazir oqıǵanyń jaı-japsary tekserilýde.