Áleýmettik jelide Almaty oblysynyń Eńbekshiqazaq aýdanyna qarasty Báıdibek aýylynda jergilikti turǵyndar jınalyp, sherý ótkizgeni jaıynda habar taraǵan bolatyn. Oqıǵaǵa osy aýdandaǵy Ashysaı aýylynda bolǵan qylmystyq oqıǵa túrtki bolǵan eken, - dep habarlaıdy egemen.kz.
Quqyq qorǵaý oryndary taratqan málimetke sáıkes, 15 tamyz kúni belgisiz bireýler osy aýyl turǵynyn óltirip ketken. Denesiniń toǵyz jerinen pyshaq jaraqatyn alǵan adam Ashysaı aýylynyń turǵyny, qoǵam belsendisi Nurlan Ahmetov bolyp shyqty. Aýyr jaǵdaıda aýrýhana jetkizilgen azamattyń ómirine dárigerler de arasha bola almaǵan. Al marqumdy aqtyq saparǵa shyǵaryp salýǵa jınalǵan jurt buǵan deıin de qoǵam belsendisine birneshe márte qastandyq jasalǵanyn aıtyp, istiń anyq-qanyǵyn tekserýge jergilikti quqyq qorǵaý organdarynyń qulyqsyzdyq tanytyp otyrǵanyna narazylyq bildirgen. Aýyl turǵyndarynyń aıtýynsha, Nurlan Ahmetovke jasalǵan qastandyqqa osy aýdannyń Báıdibek aýylynda turatyn qylmystyq top músheleriniń qatysy bolýy múmkin eken. Al polısııanyń tergeý isine qatysty málimetterdi ashyq jarııalamaýy turǵyndardyń kóńilindegi kúdikti odan ári qoıýlata túskendeı. Osy máseleniń jaıyn bilmek bolǵan narazy top Báıdibek aýylyna kelip, jergilikti bılik ókilderimen kezdesken eken. Aýyl turǵyndary ashyq áńgimelesýden keıin tarady.
- Kisi ólimi 15 tamyz senbige qaraǵan túni boldy. Er adamdy óz úıinde belgisiz bireý pyshaqtap ketken. Jaraqat alǵan azamat Shelek aýylynyń aýrýhanasyna jetkizildi, biraq ony qutqarý múmkin bolmady. Azamat alǵan jaraqatynan qaıtys boldy. Atalǵan fakti boıynsha Qylmystyq kodekstiń 99-babynyń 1-bóligi boıynsha sotqa deıingi tergeý bastaldy. Kúdiktilerdi ustaýǵa baǵyttalǵan jedel-tergeý sharalary júrgizilýde. Jaǵdaı jergilikti atqarýshy jáne quqyq qorǵaý organdarynyń baqylaýynda, - deıdi oqıǵaǵa oraı resmı málimdeme jasaǵan Almaty oblysynyń polısııa departamenti. Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.