Nur-Sultan qalasy Saryarqa aýdany aýmaǵynda 540 aýla bar, olardyń 77,5% qanaǵattanarlyq jaǵdaıda. Bıyl 40 aýla alańy jóndelýde. Bul týraly Saryarqa aýdanynyń ákimi Erǵalı Egemberdi Nur-Sultan qalalyq ákimdiginiń resmı ınstagram paraqshasyndaǵy tikeleı efır kezinde aıtty, - dep habarlaıdy Egemen.kz.
Aýmaqty abattandyrý jáne asfalttaý máselesi óte ózekti. Sondyqtan ákim turǵyndardy bastama kóterýge shaqyrdy.
«Bıyl ekinshi jyl qatarynan «Bıýdjetke qatysý» jobasy júzege asyrylýda. Saryarqa aýdany ákimi apparatynyń saıtyna kirý qajet. Onda siz qatysýdyń barlyq talaptaryn kóresiz. Belsendi bolyńyz, jumys isteńiz, sizdermen birge biz barlyq máselelerdi sheshemiz», – dedi Erǵalı Egemberdi.
Gazdandyrý – aımaqta kún tártibindegi basty máseleniń biri. Búgingi kúnge josparlanǵan 200 km-diń 101 km-de jumystar aıaqtaldy. Qazir kvartalishilik qubyrlar tartylýda.
«Kóktal-1 alabynda 91 kóshe bar, olardyń 88-ne qubyr tartý aıaqtaldy. Kóktal-2-de jalpy kósheler sany – 41, jumys eki kóshede qaldy. Agroqalashyqtaǵy 94 kósheniń 22-de jumystar josparlanǵan. Bul joba birneshe jylǵa arnalǵan. Qazir osy aýdandarda 10 230 jeke turǵyn úı bar, onyń ishinde bıyl 5000-nan astam úıdi gazdandyrý josparlanýda. Biz kvartalishilik qubyrlardy júrgizemiz. Kósheden úıge, jelilerge, qubyrlarǵa úı ıesi óz qarajaty esebinen júrgizedi. Bul shamamen 300 myń teńgeden astam qarjy turady. Eseptegishter ákimdik esebinen ornatylady. Tehnıkalyq sharttar berý jumystary bastaldy. Ony alý úshin jumys kúnderi Kóktal-1, Bolashaq kóshesi, 4/2 meken-jaıy boıynsha baılanysa alasyz», – dep túsindirdi aýdan ákimi.
Tikeleı efır barysynda Erǵalı Egemberdi úılerdi súrý josparlary týraly aıtty.
«Tórt úıdi buzý josparlanǵan – Altynsarın kóshesi 5/2, 5/3, 5/4 jáne Besshatyr kóshesi, 8 – 240 adam turatyn 50 páter», – dedi ákim.
Efır barysynda jaryqtandyrý, kógaldandyrý, áleýmettik sala, Jańa Seıfýllın jolynyń ashylýy týraly máseleler de qozǵaldy.