Búginde Qazaqstan azamattaryna tirkelgen armenııalyq nómirli kólikterdiń sany 22 myń. Alaıda onyń tek 11 myńǵa jýyǵy elimizde tirkeýden ótken. Tutastaı 14 myń avtokólik tirkelýi tıis. Bul týraly Ortalyq kommýnıkasııalar qyzmetinde ótken baspasóz máslıhatynda Ishki ister mınıstriniń keńesshisi Nurdildá Oraz aıtty.
Jaýapty vedomstvonyń ókili tirkelýge jatatyn qalǵan avtokólikter on kúnniń ishinde qajetti rásimderden ótedi degen senimde. О́ıtkeni tirkeý naýqany 1-shi qyrkúıekke deıin jalǵasady. Biraq quzyrly organ mamandary qaıta jabdyqtalǵan kólikterdiń erekshelikteri eskerilip, olardy tirkeý jumystarynyń merzimin uzartý máselesi qaralatynyn joqqa shyǵarmady.
"Tirkeý boıynsha belgili talaptar bar ekenin eskersek, Úkimet qaýlysynda onyń naqty merzimi kórsetilgen. Tirkeý 1 qyrkúıekke deıin jalǵasady. Osy ýaqytqa deıin belgilengen sharttarǵa sáıkes, barlyq kólik quraly tirkeledi dep josparlanýda. Azamattardyń ótinishterin esepke alsaq, Tehnıkalyq retteý jáne metrologııa komıteti qaıta jabdyqtalǵan avtokólikterdi tirkeý ýaqytyn uzartý máselesi pysyqtalyp jatyr", dedi IIM Ákimshilik polısııa komıteti tóraǵasynyń orynbasary Serik Túsipov.
Ákimshilik polısııa komıteti tóraǵasynyń orynbasary basqarý rýli oń jaqta ornalasqan avtokólikter tirkeý naýqanyna qatysa almaıtynyn eske saldy. Bul kólikterdi tirkeýge Qazaqstanda 2009 jyldan beri tyıym salynǵan. Atalǵan másele elimizdegi jol qozǵalysyna qatysty zańmen qatar, Keden odaǵynyń tehnıkalyq reglamentimen retteledi.
Saýda jáne ıntegrasııa mınıstrligi Kóliktik retteý jáne metrologııa komıteti tóraǵasynyń orynbasary Serik Qusaıynov Armenııada basqarý rýli oń jaqtan solǵa qaraı aýystyrylǵan avtokólikterdiń Qazaqstanda qaýipsizdik sertıfıkatyn alýy mindetti ekenin eske saldy. Bul sertıfıkatty arnaıy zerthanalardan alýǵa bolady.
Esterińizge sala keteıik, bıyl mamyrdyń 20-da Qazaqstan Úkimeti Armenııada tirkelgen jekelegen kólik quraldaryn elimizge ákelip, paıdalaný boıynsha keıbir máseleler týraly qaýly qabyldady. Soǵan sáıkes, osy jyldyń 1-shi qyrkúıegine deıin Armenııanyń ýákiletti organdarynda Qazaqstan azamattaryna tirkelip, elimizge 1 aqpanǵa deıin ákelingen basqarý rýli sol jaqta ornalasqan kólik quraldaryn memlekettik tirkeý úshin alym tóleý jóninde sharalar qarastyrylǵan.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.