Iphone-nynan kóz jazyp qalǵan Malaızııa turǵyny urynyń kim ekenin bilgenimen, oǵan jaza qoldana almaı qınalyp otyr. О́ıtkeni, qaltafondy qoldy qylǵan jergilikti maımyl bolyp shyqqan, dep habarlaıdy Egemen.kz
Malaızııanyń Batý qalasynda turatyn 20 jastaǵy stýdent Zakrıdz Rodzı (Zackrydz Rodzi) Pahat erekshe jaǵdaıǵa tap boldy. Onyń úıinen smartfony urlanǵan. Sonshalyqty uqypty áreket etken baýkespe artynan eshqandaı iz qaldyrmapty.
"Men oıanyp, smartfonnyń ornynda joq ekenin baıqadym. Bir qyzyǵy, onyń muqabasyn sheship, qaldyryp ketipti. Úıdiń esigi jabyq, kilt te, qulyp ta ornynda. Eń tańqalarlyǵy, telefon qosýly boldy, biraq meniń qońyraýlaryma eshkim jaýap bermedi", deıdi jábirlenýshi óziniń Facebook paraqshasynda.
Sodan keıin bolashaq programmıst smartfonnyń ornalasqan jerin geolokasııa arqyly tanýǵa tyrysqan. Biraq bul nátıje bermepti. Túısigine súıengen, jigit ákesimen birge úıdiń janyndaǵy djýnglıge attanady. О́z nómirine qońyraý shalyp, ol palma aǵashynyń astyndaǵy tanys áýendi esitedi. Osylaısha, joǵalǵan qurylǵysyn taýypty.
iPhone dymqyl ári las boldy. Biraq esh jerine syzat túspegen jáne synbaǵan. Qosymshalardy teksere otyryp, smartfonnyń ıesi tań qalady. Telefon galereıasy maımyl jasaǵan fotosýretter men beıneler toly bolypty. Bir qyzyǵy, barlyq foto jáne vıdeo túsirilimderdi maımyl selfı arqyly jasaǵan.