Qazaqstan Premer-Mınıstri A. Mamın Túrikmenstan Prezıdenti G. Berdymýhamedovpen kelissóz júrgizdi, dep habarlaıdy Egemen.kz Premer-Mınıstrdiń baspasóz qyzmetine silteme jasap.
Búgin Ashhabad qalasynda QR Premer-Mınıstri Asqar Mamın Túrikmenstan Prezıdenti Gýrbangýly Berdymýhamedovpen kezdesti.
Taraptar damýdyń joǵary qarqynyn jáne ekonomıkalyq saladaǵy ekijaqty yntymaqtastyqty odan ári arttyrý úshin úlken áleýettiń bar ekenin atap ótti.
Karantın sharalaryna jáne álemde oryn alǵan qazirgi jaǵdaıǵa qaramastan, Qazaqstannyń Túrikmenstanmen saýda deńgeıi turaqty ósimdi saqtap qaldy — 2020 jylǵy qańtar-shilde aılarynda taýar aınalymy 10%-ǵa shamamen $100 mln-ǵa deıin ulǵaıdy. Bıylǵy qańtar-tamyz aılarynda Qazaqstan aýmaǵy arqyly Túrikmenstanǵa temirjol júkterin tranzıtpen tasymaldaý kólemi 55%-ǵa artty.
Kelissóz barysynda saýda-ekonomıkalyq, ınvestısııalyq, energetıkalyq, tranzıttik-kólik jáne aýyl sharýashylyǵy salalaryndaǵy yntymaqtastyqtyń ózekti máseleleri talqylandy. Sonymen qatar Qazaqstannyń Mańǵystaý oblysy men Túrikmenstannyń Balqaný álaıaty arasyndaǵy shekara mańy yntymaqtastyǵyn damytý keleshegine, onyń ishinde eki eldiń shekarasynda shekara mańy saýdasynyń arnaıy aımaǵyn qurý jolymen damytýǵa erekshe nazar aýdaryldy.
Sondaı-aq Ashhabad qalasyna jumys sapary aıasynda QR Premer-Mınıstri A. Mamın Túrikmenstannyń Mınıstrler kabıneti basshysynyń orynbasarlary R. Meredovpen, B. Ovezovpen jáne M. Meredovpen jeke kelissózder júrgizdi, onda ekonomıkalyq yntymaqtastyqty odan ári nyǵaıtýdyń praktıkalyq sharalary qaraldy.