Búgin Tólebı aýdany ákimdiginiń aktıvi men máslıhat depýtattarynyń kezekti sessııa otyrysynda aýdannyń áleýmettik-ekonomıkalyq damýyna úles qosqan birqatar azamattarǵa "Tólebı aýdanynyń qurmetti azamaty" ataǵy resmı túrde tabystaldy, dep habarlaıdy Egemen.kz
Týǵan ólkege etken eńbegi elenip, baǵalanǵan azamattardyń qatarynda áriptesimiz Egemen Qazaqstan gazetiniń Túrkistan oblysy boıynsha menshikti tilshisi, Jýrnalıster Odaǵy Túrkistan oblystyq fılıalynyń tóraǵasy Ǵalymjan Elshibaı da boldy.
Áriptesimizge aýdan ákimi Baýyrjan Omarbekov, máslıhat hatshysy Nurlan Qoıbaǵarov, Ardagerler keńesiniń tóraǵasy Átirhan Shyńǵysbaı máslıhat depýtattary men ákimdik aktıviniń aldynda alqaly marapatty saltanatty túrde tabystady.
Qurmetke bólengen jerlesterge júrekjardy aq tilekterin arnaǵan el aǵalary marapat ıelerin ólkeniń órkendeýi jolynda munan bylaı da aıanbaı eńbek etýge shaqyrdy.
Aqparat salasynyń maıtalmany Ǵalymjan Qamytbekulynyń Tólebı aýdanyna, onyń ishinde týyp, ósken aýyly – Qasqasýdyń kórkeıip, gúldenýine sińirgen eńbegi eren. Bul jóninde aqparat salasyndaǵy áriptes-dosy, búginde Jambyl qoblystyq "Aqjol" gazetiniń bas redaktory Oralhan Dáýit áleýmettik jelidegi paraqshasynda:
"Áli esimde... Shamamen 2000 jyldardyń shamasy bolýy kerek. "Ońtústik Qazaqstan" gazetinde jumys isteıtin kezim. Redaksııaǵa Tólebı aýdany, Qasqasý aýylynyń bir top aqsaqaldary keldi. Qastarynda Ǵalymjan Elshibaı dosym bar.
Dál sol kezde tabıǵaty tamasha, taý etegindegi Qasqasýdan bir kásipkerler shahta ashamyz dep shabylyp jatqan bolatyn. Ǵalymjan dosym qazaqtyń Shveısarııasy atanǵan shatqaldyń shahtaǵa aınalyp ketpeýi úshin baryn saldy. Aýdandyq gazetten respýblıkalyq gazetterge deıin maqala jazyp, másele qyp kóterdi.
Oblystyq gazettiń bas redaktory Orazhan Jarqynbek aǵamyz eldiń máselesin óziniń máselesindeı kóretin keń júrekti azamat edi ǵoı. Aqsaqaldardyń áńgimesin asyqpaı tyńdap, shaıyn berip, sol kúngi nómirdiń birinshi betine josparlanǵan bas maqalany aldyryp tastap, qasqasýlyqtardyń máselesin birinshi betten, birinshi plannan bergizdi.
Ǵalymjan dosym munymen de tynbaı respýblıkalyq "Jas Alash" gazetine jazdy, oblys basshylarynyń nazaryn aýdardy. Áıteýir, týǵan jeriniń basyna tónip turǵan qasiretine arasha túsip, barmaǵan jeri, ashpaǵan esigi qalmady. Alla saqtap, Qasqasý shatqaly shahtaǵa aınalmaı, aman qaldy. Mine, búginde Qasqasý keremet kelbetimen týrızmniń bir ortalyǵyna aınalyp otyr. Qasqasýdyń keremetin sonaý keńes zamanynda Asanbaı Asqarovtyń ózi baǵalap, ekinshi Medeý soqtyrmaq bolǵany, táýelsiz elimizdiń úkimeti de týrızm máselesin áńgime qylǵanda Qasqasýdy aınalyp ótpeıtini belgili.
Odan beride de Ǵalym dosym Qasqasý aýylynan mektep ashý úshin úıme-úı júrip, turǵyndardan qol jınady. Sol kezde "Shap-shaǵyn aýylǵa óz aldyna mektep salyp bere me?" dep kúlgender de boldy. Buǵan deıin bul aýyldyń balalary tórt-shaqyrym jerdegi kórshi aýyldyń mektebine kelip oqıtyn. Allaǵa shúkirshilik, kóp uzamaı Qasqasý aýylynyń qaq ortasynda eńseli mektep boı kóterip, búginde qanshama balaǵa bilim, qanshama adamǵa jumys berip otyr.
Osy aýyldan meshit soǵylǵanda da Ǵalym dosym alǵashqylardyń qatarynda óz qaltasynan 1 mıllıon teńge qosty. Osy Ǵalymnyń aralasýymen oblystyq máslıhattyń depýtattary Murat Tóltebaev pen Áset Qaıypbekov sııaqty mesenat jigitter de Alla úıine óz kómekterin kórsetti.
Budan bólek Ǵalymjan Elshibaı qanshama muqtaj jandarǵa kómektesip, únemi qaıyrymdylyq is-sharalardyń bel ortasynda júr", dep aǵynan aqtaryldy.