Qaraǵandy oblysynyń Balqash qalasyndaǵy mys qorytý zaýyty ekologııalyq zańnama talaptaryn saqtamaǵany úshin endi mıllıon teńgeden astam aıyppul tóleıdi, dep habarlaıdy Egemen.kz Habar 24-ke silteme jasap.
Jergilikti turǵyndardyń áleýmettik jelige júktegen beınejazbasynan soń ekologtar munda jospardan tys tekseris júrgizgen. Jyldaǵy jóndeý jumystaryna oraı kúkirt qyshqyl sehyndaǵy qondyrǵylar ýaqytsha toqtatylǵan. Dál osy kúni jel terisinen soǵyp, ýly gaz qalany basqan.
Alaıda tekseris kezinde mamandar aýadaǵy zııandy qaldyqtardyń shekti mólsherden aspaǵandyǵyn anyqtady. Sondyqtan qorshaǵan ortaǵa qanshalyqty zalal kelgendigin dóp basyp aıta almaı otyr. Degenmen, ekologııa talaptary buzylǵan deıdi tabıǵat janashyrlary.
Azamat Bektasov, Ekologııa departamenti basshysynyń mindetin atqarýshy: "О́ndiristen shyqqan shań-tozańdy súzgiden ótkizetin qondyrǵy durys jumys istemegen. Ári kúkirt qyshqyl sehynyń jumysy ýaqytsha toqtatylǵandyqtan, qalaǵa ýly gaz taraǵan. Zaýyt basshylyǵy jeldiń baǵytyn, barlyǵyn eskerý kerek edi. Sondyqtan aıyppul salyndy", deıdi ol.