Bul týraly búgin Prezıdent janyndaǵy OKQ brıfınginde AShM Veterınarlyq baqylaý jáne qadaǵalaý komıteti tóraǵasynyń mindetin atqarýshy Tursyn Qabdoldanov málimdedi, dep habarlaıdy Egemen.kz.
AShM Veterınarlyq baqylaý jáne qadaǵalaý komıtetiniń habarlaýynsha, táýlik boıynsha qus ólimi qarqynynyń tómendeýin kórsetedi. Máselen, sońǵy táýlikte Túrkistan, Jambyl, Aqtóbe, Qaraǵandy oblystarynda, Shymkent qalasynda ólim toqtady. Sonymen qatar, SQO, Pavlodar jáne Qostanaı oblystarynda ólim azaıyp keledi.
Jalpy, qus ólimi elimizdiń 7 oblysynyń 41 aýdanynyń 99 eldi mekeninde tirkelgen. Jeke aýlalarda 23 854 qustyń ólimi tirkeldi. Al eki qus fabrıkasyndaǵy ólimdi eskere otyryp, ólgen qustyń jalpy sany 330 myń bastan aspaıdy.
Tursyn Qabdoldanovtyń aıtýynsha, elimizde qus tumaýynan qyrylǵan 329691 bas úshin ótemaqy tólenedi. Bul rette ótemaqy qus ıeleriniń saraptama, joıý aktisi, qus tumaýynan bolǵan ólim-jitimdi rastaıtyn qujattary bolǵan da ǵana tólenedi.
Joǵarǵy patogendi qus tumaýynan qanattylardyń óliminiń tómendeýi qyrkúıekte indetke qarsy qabyldanǵan sharalardyń joǵary tıimdiligin kórsetedi. Vaksınalardy bólýdiń jedeldigi atap ótildi.
«Janýarlardyń asa qaýipti aýrýlarynyń aldyn alý boıynsha bekitilgen veterınarııalyq is-sharalar josparyna sáıkes aǵymdaǵy jyldyń aqpan aıynda vaksınasııa júrgizý úshin qus tumaýyna qarsy 3,3 mln-nan astam vaksına bólindi. Qosymsha qyrkúıek aıynda qus tumaýyn juqtyrý oshaqtaryn oqshaýlaý úshin respýblıkalyq rezervten 3,1 mln doza bólindi. Al osy aptanyń sońynda taǵy 1,3 mln doza jetkiziledi. Osylaısha, óńirlerge vaksınalardyń 7,7 mln dozasy bólindi. Vaksınasııa tegin júrgiziledi», - dedi Veterınarııalyq baqylaý jáne qadaǵalaý komıteti ókili.
Sondaı-aq, ol búgingi kúni májbúrli vaksınasııa aıasynda QR 8 Qazaqstannyń 8 oblysynyń 60 aýdanynyń 424 aýyldyq okrýginde 1,7 mln qusqa vaksına salyndy.
Sonymen qatar, Qabdoldanov qus ósirýshiler odaǵymen jáne jumyrtqa óndirýshiler qaýymdastyǵymen kelisilgen strategııa boıynsha respýblıkalyq bıýdjet esebinen tek qana analyq tabynǵa, sondaı-aq qus fabrıkalarynyń aınalasyndaǵy 20 shaqyrymdyq aımaqtaǵy jeke aýladaǵy qustarǵa jáne jabaıy qustardyń ushý jolyna profılaktıkalyq vaksınasııa júrgiziletinin atap ótti. Osylaısha, jyl basynda bólingen preparattardyń sany 100% vaksınasııalaýǵa jetti.
«Qoldanystaǵy veterınarlyq zańnama aıasynda qus fabrıkalary ózderi vaksınasııa júrgizedi. Bul rette broılerlik baǵyttaǵy qus fabrıkalary broılerlerdiń ómir súrý merziminiń az bolýyna (36-40 kún) baılanysty vaksınasııa júrgizbeıdi. Olar táýliktik balapandar men ınkýbasııalyq jumyrtqany qus fabrıkalarynan alady, onda analyq mal qus tumaýynan vaksınasııalanǵan. Jumyrtqa baǵytyndaǵy qus fabrıkalary analyq bas taýyqtardy vaksınasııalaıdy», - deıdi QR AShM Veterınarlyq baqylaý jáne qadaǵalaý komıteti tóraǵasynyń mindetin atqarýshy.
Sonymen qatar brıfıngte álemdegi qus tumaýy boıynsha epıdemıologııalyq jaǵdaı týraly aqparat aıtyldy. Tursyn Qabdoldanovtyń aıtýynsha, 2020 jyldyń qyrkúıeginde álemniń 26 elinde joǵary patogendi qus tumaýynyń 459 oshaǵy anyqtaldy. Kórshi Reseı Federasııasynda búginde qus tumaýynan 1,5 mıllıonnan astam qus qyrylǵan.