Nur-Sultan zeınetkerlerin áleýmettik qoldaý maqsatynda jergilikti bıýdjetten kómek kórsetiledi, dep habarlaıdy Egemen.kz.
Zeınetkerlerge aqysyz qyzmetter men aqshalaı tólemder turaqty túrde usynylyp otyrady. Onyń ishinde zeınetkerler qalalyq jolaýshylar kóligi marshrýttarynda aqysyz júrýge quqyly (taksıden basqa); qarttar kúnine jasyna qaraı 2,5 aılyq eseptik kórsetkish mólsherinde bir rettik aqshalaı tólemder; eki jylda bir ret tegin tisti protezdeý jáne protezdeý aldyndaǵy ońaltýǵa áleýmettik kómek; Qatarkól aýylynyń ońaltý ortalyǵynda sanatorıı-kýrorttyq emdeý qyzmetteri. Bul rette, jasy boıynsha zeınetkerler joldama qunynyń 35% tólemin, eń tómengi zeınetaqy alýshylar - 25% tólemdi paıdalana alady.
Sondaı-aq qarttar qatty otyn satyp alǵany úshin ótemaqy alady (jan basyna shaqqandaǵy ortasha tabysy tórt eń tómengi jalaqy mólsherinen asatyn, sondaı-aq tirkelgen turǵyn úıi birden kóp adamdardy qospaǵanda).
«Turmysy tómen otbasylarǵa, onyń ishinde turǵyn úıdiń ıesi nemese jaldaýshysy bolyp tabylatyn zeınetkerlerge kommýnaldyq qyzmetter men basqa da qyzmetterge aqy tóleý shyǵyndary osy maqsattarǵa arnalǵan otbasylyq shyǵystardyń ruqsat etilgen shekti deńgeıinen asyp ketken jaǵdaıda, jergilikti bıýdjetten kómek kórsetiledi. Nur-Sultanda shekti ruqsat etilgen deńgeı otbasynyń ortasha aılyq jıyntyq kirisiniń 5%-yn quraıdy», – dep atap ótti jumyspen qamtý jáne áleýmettik qorǵaý basqarmasy.
Sondaı-aq memlekettik organdar jalǵyzbasty zeınetkerlerdi medısınalyq-áleýmettik mekemelerge tirkeý jáne úıdegi áleýmettik qyzmetter boıynsha jumys júrgizýde. Esterińizge sala keteıik, elordada júz myńǵa jýyq zeınetker turady.