Jetisý sharýalary kúzgi jıyn-terin naýqanyna qarqyndy kirisken edi. Endigi eginjaıdaǵy jumystyń negizgi bóligi aıaqtalyp, dándi daqyldar men baqsha ónimderi tolyqtaı jınaldy deýge negiz bar. Qazir dıqandardyń bir toby qyzylsha tanabyndaǵy tátti túbir qazýǵa jumylsa, ekinshi bóligi júgeri men kúrish alqabynda jumys istep jatyr. Bul sharýada Panfılov aýdany men Balqash aýdany kóshbasshy.
Jalpy, Almaty oblysynyń Jarkent óńirin otandyq júgeri sharýashylyǵynyń otany deýge bolady. Bıyl Panfılov aýdanynda 26 myń gektardan astam alqapqa júgeri sebilgen-di. Búginde dıqandar «dala arýy» atanǵan dándi daqyldy oryp, qambaǵa quıýda.
Jyldaǵydaı emes, bıyl Jarkent óńirinde jańbyr az boldy. Keı aýyldardyń alqaptary qurǵaqshylyqqa ushyrady. Sharýalardyń 70 gektar jerge ekken dáni kúıip ketipti. Soǵan qaramastan aýdan boıynsha 167,3 myń tonna júgeri jınaý maqsaty tur. Boljam boıynsha ár gektarǵa shaqqandaǵy ortasha túsim 64,1 sentnerden aınalýy tıis.
Bıylǵy ónim jınalatyn alqap sany jyldaǵydan ulǵaıǵanyn aıta keteıik. Júgerisi jaıqalǵan egistik kólemi 124 gektarǵa jetedi.
– Kóktemgi egis naýqany pandemııanyń shekteý sharalarymen tuspa-tus kelip qaldy. Alaıda qatań sharalar dıqandardyń jumysyna keri áserin tıgizbedi. О́ıtkeni aýyl sharýashylyǵymen aınalysatyn salanyń eńbekkerlerin qoldaý men jeńildikter jetkilikti deńgeıde jasaldy. Saqtyq sharasy da joǵary deńgeıde júrdi. Ásirese sharýa qojalyqtaryna memleket jaqsy qoldaý kórsetti. Tuqym, janar-jaǵarmaı, tehnıkamen qamtýda kedergi bolmady. Aýdan boıynsha arzan baǵamen alynǵan 380 tonna dızel otyny der kezinde sharýalarǵa jetti, – deıdi Panfılov aýdandyq aýyl sharýashylyǵy bóliminiń basshysy Jumaǵazy Naımantaev.
Jyl basynan beri aýdannyń aýylsharýashylyq salasyna 1 mlrd 20 mln teńge ınvestısııa tartylǵanyn atap ótken lázim. Oǵan 48 dana tehnıka satyp alyndy. «Agrarlyq nesıe korporasııasy» arqyly 5 sharýa qojalyǵy 305 mln 955 myń teńgeniń jeńildetilgen nesıesin alsa, 44 jeke seriktestikke 142,4 mln teńge mólsherinde qosymsha qarjylaı qoldaý kórsetildi.
Aıtpaqshy, oblysta 81,8 myń gektardy qamtıtyn sýarý jelilerin qaıta jańartý, qaıta salý, apatty jaǵdaıda turǵan sýqoımalar men toǵandardy qalpyna keltirý jumystary júzege asyp jatyr. Bul óz kezeginde óńirdegi egis alqaptarynyń kólemin arttyryp, sýarmaly alqaptan mol ónim alýǵa jol ashady.
Osy jobanyń qatarynda Balqash aýdanyndaǵy 7 myń 481 gektar aýmaqty sýmen jabdyqtaýǵa múmkindik beretin Aqdala massıvin qalpyna keltirý jumysy da bar eken. Qýanyshtysy, joba júzege asqannan keıin Balqash óńirinde kúrish atyzdarynyń aýmaǵy qazirgiden anaǵurlym ulǵaıýǵa tıis. О́ıtkeni óńirdegi aq marjan ósiretin biregeı aýdan – osy Balqash. Al qazir aýdan dıqandary kúrish oryp jatyr.
– Aýa raıynyń qolaısyzdyǵyna qaramastan, eńbekshi qaýym kún-tún demeı qyzý eńbektiń kórigin qyzdyryp, judyryqtaı jumyla bilýde. Erte kóktemde aýdan boıynsha 8 861 gektar alqapqa kúrish egilgen bolsa, búgingi tańda onyń 2 184 gektary orylyp, 1 061 gektardyń ónimi bastyryldy. Kúrish orýda ozyq turǵan birqatar sharýashylyqty atap ótsek, «О́tes», «Birlik» agrofırmalary, «Dınara» óndiristik kooperatıvi jáne «О́tes-Aqdala» seriktestigi joǵary ónim alyp, tabysqa qol jetkizip otyr, – deıdi Balqash aýdandyq aýyl sharýashylyǵy bóliminiń basshysy Búrkit Muqanov.
Almaty oblysy