Elimizdegi eń astyqty óńirlerdiń alǵashqy úshtiginen tabylatyn oblys dıqandary erte kóktemde 4,4 mln gektar alqapqa dándi daqyldar tuqymyn sińirgen bolatyn. El qamyn oılaǵan eseli eńbekteriniń arqasynda jerde ósken dándi jerde qaldyrmaı, ýaqytyly tap-tuınaqtaı etip jınap aldy. Qyrmandaǵy qyzyl dándi taý-teńiz etip tekshelegen tolaıym tabys tegeýirindi eńbekpen kelgendigi daýsyz, dep jazady Egemen.kz
Uzaq jyldar boıy tolymdy tájirıbe qalyptastyrǵan aımaqtyń aýyl sharýashylyǵy eńbekkerleri 5,2 mln tonna astyq bastyrdy. Bul kórsetkish ótken jylmen salystyrǵanda, 17 paıyzǵa kóp. Jazda jańbyr ala-qula jaýdy. Keıbir aýdandarda tipti aspannan nár tamǵan joq. Kún eresen ystyq boldy. Aýa raıynyń osyndaı qolaısyz keziniń ózinde oblys boıynsha gektar berekesi 11,8 sentnerden aınalyp otyr. Bul oraıdaǵy tabys kólemi de ótken jylmen salystyrǵanda áldeqaıda kóp.
–Astyq sapasy ótken jylmen salystyrǵanda óte jaqsy. 95 paıyzy úshinshi klasty. Qazirgi kúni astyq qabyldaý kásiporyndaryna jetkizilgen dánniń qamyrlylyǵy 30 paıyzdan joǵary. 2019 jyly bul kórsetkish nebári 12 paıyz bolyp edi, – deıdi oblystyq aýyl sharýashylyǵy basqarmasynyń basshysy Dımash Talasbaev.
Búginde elevatorlarǵa 2 mln tonnadan astam jańa astyq jetkizilgen. Qazir keptirilip, tazartylyp jatyr. Egin oraǵynyń kúzgi jaýyn-shashynǵa urynbaı, ýaqytyly aıaqtalýyna mashına-traktor parkiniń jańartylýy jaqsy sebep bolyp otyr. Máselen, bıylǵy egin oraǵyna segiz myńnan astam astyq jınaıtyn kombaındar qatystyrylǵan. Onyń ishinde joǵary ónimdi sheteldik tehnıkanyń úlesi basym.
О́ńirdegi astyqty aýdandardyń biri – Sandyqtaý. Egistik kólemi jáne alynǵan ónimi jaǵynan aldyńǵy lektegi óńir. Aýdan dıqandary egin oraǵyn qysqa merzimde aıaqtap shyqty. Gektar berekesi 15 sentnerden aınaldy.
Al maıly daqyldar túsimi 8,2 sentnerden oralyp otyr. Egin oraǵynyń sońǵy aptasynda ýaqytpen sanaspaı jumys istegen dıqan mehanızatorlar táýligine 15-20 myń gektar jerdiń eginin jınady.
Aýdandaǵy myqty sharýashylyqtar qatarynan "Svobodnoe", "Trýd", "Belgorodskıı" seriktestikterin ataı ketýge bolady. Máselen, bıyl belgorodtyqtar gektar berekesin 26,1 sentnerden, "Kamenka ı D" seriktestigi 24 sentnerden aınaldyrdy. Osy qatardan "PZ Balkashınskıı", "Svobodnoe" seriktestikteri de tabylyp otyr. Dıqandardyń aıtýyna qaraǵanda, qurǵaqshylyq jyly berekeniń molynan oralýy eń aldymen agrotehnıkalyq sharalardy durys úılestirilýlerinde eken.
Bul sharýashylyqtarda topyraq óńdeý mádenıeti jyl saıyn jetildirilip keledi. Onyń ústine organıkalyq jáne mıneraldy tyńaıtqyshtardy ǵylymı negizde paıdalanady. Eń bastysy, joǵary ónimdi tuqym qoryn suryptap, keler jylǵy egistiń kepili retinde saqtaýda.
Oblys jıyn-terimdi abyroımen aıaqtap, qazir súdiger jyrtýǵa kirisýde. Erteńniń qamyn búgin oılamasa bola ma?!