Almaty ákimi Baqytjan Saǵyntaevtyń tapsyrmasy boıynsha epıdemııaǵa qarsy rejımdi kúsheıtý jáne megapolısti shetelden koronavırýs ákelýden qosymsha qorǵaý sharalary qabyldandy, dep habarlaıdy Egemen.kz.
QR Bas memlekettik sanıtarlyq dárigeriniń №54 qaýlysyn iske asyrý sheńberinde qalanyń bas memlekettik sanıtar dárigeri Jandarbek Bekshın Almaty halyqaralyq áýejaıynda Qazaqstan Respýblıkasynyń Memlekettik shekarasynda sanıtarlyq-epıdemııalyq sharalardy qatańdatý jóninde qaýly qabyldady.
Osyǵan baılanysty Almaty ákiminiń orynbasary Erjan Babaqumarov qalanyń Bas memlekettik sanıtar dárigeri J.Bekshınmen birlesip áýejaı aýmaǵynda halyqaralyq reısterdiń jolaýshylaryn qarsy alýdaǵy qyzmetterdi úılestirý jáne jedel ózara is-qımyl máseleleri boıynsha jumys semınar-keńesin ótkizdi. Áýejaı ákimshiligi, shekara qyzmeti, qala men áýejaıdyń sanıtarlyq-epıdemııalyq qyzmetteri basshylyǵynyń, sondaı-aq áýe aılaǵynda sanıtarlyq-epıdemııalyq qaýipsizdik sharalaryn qamtamasyz etýge tartylǵan qalalyq qurylymdardyń ókilderi qatysty.
Semınar-keńes barysynda PTR-testileýdi ótkizý týraly anyqtamasyz jolaýshylardy anyqtaý úshin jolaýshylardy otyrǵyzý jáne adamdardy jerge qondyrǵan sátinen bastap ýákiletti qurylymdardyń is-qımyl algorıtmi pysyqtalyp, nusqama júrgizildi.
Almaty halyqaralyq áýejaıynyń aýmaǵynda halyqaralyq jolaýshylar áýe areısterimen keletin adamdardyń baılanyssyz termometrııasy júrgiziledi. Áýejaı qyzmetkerleri jeke qorǵanys quraldarymen qamtamasyz etilgen. Áýejaı aýmaǵynda mindetti maska rejımi jáne áleýmettik qashyqtyqty saqtaý talaby saqtalady.
Áýejaı ǵımaratynda ushyp shyǵatyn jolaýshylar úshin PTR-dıagnostıkaǵa lısenzııalanǵan synama alý pýnkti ashyldy.
Dene qyzýy joǵary nemese aýrý belgileri (jótel, entigý, tynys alýdyń qıyndaýy) bar adamdar Almaty qalasy áýejaıynyń oqshaýlaǵyshyna ornalastyrylady nemese áýe kemesiniń bortynan jedel járdem mashınalarymen dıfferensıaldy dıagnostıka men emdeý júrgizý úshin qalanyń ınfeksııalyq stasıonarlaryna tasymaldanatyn bolady.
Sondaı-aq, jumys toby qalaǵa PTR-testileýsiz keletin jolaýshylardy ýaqytsha ustaýǵa arnalǵan qonaq úılerdiń daıyndyǵyn tekserdi. Munda PTR-syz adamdardyń ýaqytsha bolýy, oqshaýlaýdy qamtamasyz etý jáne sanıtarlyq-epıdemııalyq qaýipsizdiktiń ózge de talaptaryn saqtaý úshin qajetti jaǵdaılar jasalǵan.
QR Bas memlekettik dárigeriniń qaýlysyna sáıkes, Qazaqstan Respýblıkasynyń Memlekettik shekarasynan ótý kezinde ózge eldiń azamattary qoldarynda COVID-19-ǵa alynǵan testtiń nátıjesi 72 saǵattan aspaǵanyn kórsetetin anyqtama bolmaǵan jaǵdaıda, qalaǵa kirýlerine jol berilmeıdi.
Shetelden anyqtamasyz kelgen QR azamattary áýejaı aýmaǵynan PTR-testileýdi ótkizý úshin jáne nátıjelerdi kútý kezeńinde ýaqytsha megapolıstiń qonaq úılerine ornalastyrylady.
О́z kezeginde, buǵan deıin QR ınfraqurylym jáne Indýstrııalyq damý mınıstrliginiń Azamattyq avıasııa komıteti áýe kompanııalaryna PTR-testileýden ótkeni týraly anyqtama bolmaǵan jaǵdaıda Qazaqstan Respýblıkasynyń azamattary bolyp tabylmaıtyn jolaýshylardy bortqa jibermeýdi tapsyrǵan.
Almaty qalasynyń ákimdigi qala turǵyndary men qonaqtarynan osy talaptardy saqtaýdy jáne megapolıs aýmaǵyna kelgenge deıin PTR-testileýden ótýdi suraıdy.