Dárilik zattardy saraptaý ulttyq ortalyǵynyń habarlaýynsha, Qazaqstanda tirkelgen barlyq dári-dármek jınaqtalǵan DariKz mobıldi qosymshasynyń jańartylǵan nusqasy iOS platformasynda shtattyq rejimde jumys isteıdi.
Qosymsha paıdalanýǵa yńǵaıly, áldeqaıda jyldam jumys isteıdi jáne AppStore-niń barlyq talaptaryna sáıkes keledi.
DariKz mobıldi qosymshasyn paıdalana otyryp, elimizde tirkelgen dáriler týraly aqparat alýǵa bolady. Qosymshada dárilik preparattyń dozasy, konsentrasııasy, saqtaý merzimi jáne erekshe belgileri, dári túpnusqa nemese djenerık pa, dárigerdiń resepti boıynsha berile me, álde resepsiz be, mine osylar týraly aqparat bar.
Sondaı-aq «Shekti baǵa» bóliminde dári-dármektiń baǵasyn baqylaýǵa bolady. Eger dári-dármektiń baǵasy Qazaqstanda bekitilgen shekti baǵadan asyp ketse, qosymshada shaǵym qaldyra alasyz. Búgingi kúni qosymshadaǵy dárilik zattardyń derekter bazasyna 18 myńǵa jýyq preparat engizildi, onyń ishinde 6 500 dárige shekti baǵa belgilendi.
Qosymshadan izdegen dárińizdi preparattyń saýdalyq nemese halyqaralyq patenttelmegen ataýy, tirkeý nómiri arqyly tabýǵa bolady. Azamattarǵa yńǵaıly bolý úshin dári-dármek týraly barlyq aqparat memlekettik, orys jáne aǵylshyn tilderinde usynylady.
Aıta ketý kerek, Android platformasynda DariKz qosymshasyn 123 myń qoldanýshy júktep alyp, qoldanýda.
DariKz qosymshasynyń 1.5.3 nómirli jańa nusqasy iOS platformasynda jumys isteıtin smartfondarǵa júkteý úshin qoljetimdi.