Ranking.kz-tiń málimetinshe, Qazaqstanda sheteldik kásipkerlerdiń qatysýmen 21,7 myń kompanııa jumys istep tur. Bul ótken jyldyń sáıkes kezeńimen salystyrǵanda 11,8% kóp (19,4 myń kompanııa). Sonyń ishinde 21,1 myńy (97,3%) shaǵyn kompanııalar, al 325 kompanııa (1,5%) ortasha, 260-y (1,2%) iri kompanııalar, dep habarlaıdy Egemen.kz
Kóbinese sheteldik kompanııalar kóterme jáne bólshek saýdada jumys isteıdi: 8,6 myń. Qurylys salasynda olardyń sany – 2,2 myń, kásibı, ǵylymı jáne tehnıkalyq qyzmet salasynda – 1,6 myń. Qazaqstandaǵy sheteldik kompanııalardyń eń kóbisi – reseılikter. Máselen, bıyl tamyz aıynyń sońynda Qazaqstanda reseılik 7,40 myń kompanııa jumys istep turdy, olardyń kópshiligi saýda salasynda (3,61 myń kompanııa).
Sondaı-aq Qazaqstanda túrkııalyq kásiporyndar da kóp: 2,44 myń. Túrik kompanııalary kóbinese saýda, qurylys jáne óndiris salasynda eńbek etedi. Qazaqstandaǵy sheteldik kompanııalardyń sany boıynsha alǵashqy úshtikke Qytaı kiredi: 1,24 myń kásiporyn. Sonyń 1,20 myńy shaǵyn kompanııalar, 16-sy ortasha jáne 20-sy iri kompanııalar.