Atyraýda taǵy bir mas júrgizýshi 7 jylǵa kólik júrgizý quqyǵynan aıryldy, dep habarlaıdy Egemen.kz.
Atyraý qalalyq polısııa basqarmasynyń patrýldik polısııa qyzmetkerleri 17 qazanda túngi saǵat 01:30-da Tasqala aýylynyń 9-kóshesinde "Skoda Rapid" markaly avtokólikti toqtatqan eken. Sheteldik kóliktiń rýlinde otyrǵan júrgizýshiden alkogoldik ishimdiktiń ıisi shyqqan.
"Júrgizýshi jeke basyn anyqtaý maqsatynda qujattaryn suraǵan polısııa qyzmetkerleriniń zańdy talabyna baǵynbaǵan. Polısııa qyzmetkerlerine qarsylyq kórsetip, qujattaryn berýden bas tartqan. Patrýldik polıseıler mas júrgizýshini oblystyq narkologııalyq dıspanserge jetkizip, saraptamadan ótkizdi. Saraptama qorytyndysymen 34 jastaǵy júrgizýshiniń jeńil dárejedegi masań kúıde ekendigi anyqtaldy", - dep habarlady oblystyq polısııa departamentiniń baspasóz qyzmeti.
Mas júrgizýshige qatysty QR Ákimshilik quqyqbuzýshylyq týraly Kodekstiń eki babymen (Avtokólikti masań kúıde basqarǵany jáne polısııa qyzmetkeriniń zańdy talabyna baǵynbaý) hattamalar toltyrylyp, sotqa joldandy. Ákimshilik sottyń sheshimimen qala turǵyny 7 jylǵa kólik quralyn basqarý quqyǵynan aıyrylyp, 15 táýlikke qamaýǵa alyndy.