Bıylǵy "Volonterlar jylyna" oraı arnaıy jabdyqtalǵan "Taza júrek" kerýeni Taraz qalasynan oblystyń aýdan, aýyldaryna qaraı jol tartty, dep habarlaıdy Egemen.kz.
Jambyl oblystyq jastar saıasaty máseleleri basqarmasynyń bastamasymen uıymdastyrylǵan shara "Saýlyq" jalpyulttyq jobasy aıasynda iske asyp otyr. Atalǵan kerýenniń quramynda tájirıbeli kardıologtar men volonterlar bar. Jolǵa shyqqan mobıldi top óńirdegi shalǵaı aýyl turǵyndaryna tegin medısınalyq qyzmet kórsetedi. Ol úshin barlyq múmkindikter qarastyrylǵan.
"Taza júrek" kerýenin aýyldarǵa shyǵaryp salý saltanatyna Jambyl oblysynyń ákimi Berdibek Saparbaev arnaıy qatysyp, adamnyń ómiri men densaýlyǵy úshin aıanbaı eńbek etip júrgen medısına qyzmetkerlerine alǵys aıtty. Sonymen qatar, koronavırýs indetimen kúres kezinde de aldyńǵy shepte júrgen dárigerlerdiń eńbegi erlikpen birdeı ekenin jetkizdi. "Memleket basshysy "Elimizdiń árbir azamatynyń densaýlyǵy – bul respýblıkamyzdyń jetistigi" degen bolatyn. Medısına salasyn qoldaý, ony turaqty túrde damytý memlekettiń negizgi basymdyqtarynyń biri. Medısına salasyn qarjyldandyrý, mekemelerdi zamanaýı turǵyda jabdyqtaý nazardan tys qalǵan emes. Jambyl oblysy boıynsha koronavırýs indetimen kúres úshin jalpy 4 mıllıard 885,1 mıllıon teńge bólindi. Bul qarajattyń 218,4 mıllıon teńgesine eki ınfeksııalyq stasıonarda kúrdeli jóndeý jumystary júrgizilip, nysandar qajetti qural-jabdyqtarymen qamtamasyz etildi», dedi Berdibek Saparbaev. Sondaı-aq, 4 medısınalyq uıymǵa ottegi stansııalary, 3 dana kompıýterlik tomograf, 4 dana sıfrly, 2 dana jyljymaly rentgen apparattary jáne 2 dana EKMO apparaty ornatylǵan. Sonymen qatar, 250 dana kópfýnksıonaldy, 50 dana raenımasııalyq tósekter satyp alynǵan. Odan basqa birqatar medısınalyq mekemeler 25 dana portatıvti, 53 dana ókpeni jasandy jeldetý apparattarymen qamtylǵan. Búginde Jambyl oblystyq jedel medısınalyq járdem stansasyna 65 jedel medısınalyq járdem avtokólikteri satyp alynypty.
Saltanatty shara barysynda Berdibek Saparbaev aýdandyq emdeý mekemelerine 8 dıagnostıkalyq medısınalyq keshenniń kiltin tabystady. Al, oblystyq jedel medısınalyq járdem stansasy da 18 medısınalyq jedel járdem kóligimen tolyqty. Kólikterdiń barlyǵy da naýqastarǵa alǵashqy medısınalyq kómek kórsetý quraldarymen jabdyqtalǵan. Sondaı-aq, densaýlyq saqtaý mekemelerine de jańa jedel járdem kólikteri berildi. Jıynda koronavırýs indetimen kúres kezinde eleýli eńbek etken birqatar dárigerler Qazaqstan Respýblıkasy Prezıdentiniń Jarlyǵymen taǵaıyndalǵan «Halyq alǵysy» medalimen marapattaldy.
Jambyl oblysy