TMD Parlamentaralyq Assambleıasynyń shtab-páterinde Agrarlyq saıasat, tabıǵı resýrstar jáne ekologııa jónindegi komıssııanyń, sondaı-aq Baqylaý-bıýdjettik komıssııanyń onlaın otyrystary bolyp, oǵan Senat depýtattary Aqylbek Kúrishbaev pen Olga Perepechına qatysty, dep habarlaıdy Egemen.kz.
Aqylbek Kúrishbaev áriptesterimen birge "Taýly aımaqtardy damytý jáne qorǵaý týraly", "Qorshaǵan ortaǵa keltirilgen zııandy joıý týraly", "Qorshaǵan ortany qorǵaý, tabıǵatty paıdalaný jáne ekologııalyq qaýipsizdik salasyndaǵy memlekettik aqparattyq júıeler týraly", "Astyq týraly", "Radıoaktıvti lastanýdan zardap shekken aýmaqtardyń quqyqtyq rejımi týraly" úlgi zań jobalaryn talqylady.
Komıssııa músheleri 2020-2022 jyldarǵa arnalǵan úlgi zań shyǵarýdyń uzaq merzimdi josparynyń iske asý barysyn talqylady. Sonymen qatar, Moldova Respýblıkasynyń agrarlyq saıasat, tabıǵı resýrstar jáne ekologııa salasyndaǵy zańnamasyn damytý týraly jáne komıssııanyń bastamasymen TMD PAA qabyldaǵan úlgi zańnamalyq aktilerdi paıdalaný týraly esepti tyńdady.
Senator Olga Perepechına Bıýdjettik-baqylaý komıssııanyń otyrysyna qatysty jáne onda TMD Parlamentaralyq Assambleıasynyń qarjylyq qoldaýyna qatysty birqatar máseleler sóz boldy. Kún tártibine Assambleıanyń qyzmetin qarjylandyrý, bıýdjetti qalyptastyrý jáne oryndaý máseleleri engen bolatyn.
Komıssııa músheleri TMD PAA-ǵa múshe elderde aldaǵy josparlaý kezeńine arnalǵan memlekettik bıýdjet týraly zańdardyń qabyldanýy týraly aqparat almasty. Sonymen qatar, otyrysqa qatysýshylar TMD PAA keńesiniń qaýymdastyq qyzmetindegi qarjylyq máselelerge qatysty sheshimderiniń jobalaryn daıyndaýdy usyndy.