Energetıka mınıstrligi aı saıyn Qazaqstannyń ishki naryǵyna suıytylǵan munaı gazyn jetkizý josparyn bekitedi. Ol ákimdikterden kelip túsken jıyntyq ótinimder negizinde jasalady. Suıytylǵan gazdy ishki naryqqa jetkizýdi 9 óndirýshi zaýyt júzege asyrady.
Resmı málimetterge sáıkes, 2019 jyly suıytylǵan munaı gazynyń óndirisi 3,2 mln tonnany qurady. Bıyl da osy kórsetkish bolady dep kútilýde. 2019 jyly ishki naryqta tutyný kólemi 1,4 mln tonnany qurady, al SMG tutyný boljamy 1,5 mln tonna bolady dep kútilýde. Bul týraly Ortalyq kommýnıkasııalar qyzmetinde EM Gaz jáne munaı-gaz-hımııa departamentiniń dırektory Zııash Qııaqbaev málimdedi.
«Elimizde suıytylǵan gazǵa belgilengen shekti kóterme baǵa tonnasyna 43 345 tg. quraıdy (QQS qosa alǵanda). Bul baǵa shekaralas jáne kórshi elderdegi eksporttyq baǵalardan ǵana emes, kóterme baǵalardan da tómen. Mysaly, Reseıdiń shekaralas oblystarynda baǵa tonnasyna 164 100 tg., Tájikstanda – tonnasyna 182 750 teńge. Qazaqstandaǵy jáne kórshi elderdegi atalyp ótken baǵalardaǵy aıtarlyqtaı ózgeshelik óz kezeginde ishki naryqta jetispeýshiliktiń týyndaýyna jáne kóleńkeli eksportqa alyp kelýi múmkin. Bul óz kezeginde, ishki naryqta defısıttiń oryn alýyna ákeledi. Mundaı jaǵdaılar 2017 jyly oryn alǵan, osy faktilerdi anyqtaý úshin Energetıka mınıstrligi tıisti ýákiletti organdarǵa hat joldady», - , - dep atap ótti Qııaqbaev.
Onyń atap ótýinshe, 7 qazanda Energetıka mınıstrligi Qazaqstan aýmaǵynan úsh jyl merzim ishinde avtokólikpen SMG eksporttaýǵa tyıym saldy. Bul SMG-ny elden tys zańsyz shyǵarý jáne ishki naryqta SMG jetispeýshiligin boldyrmaý úshin jasaldy.