Pavlodar oblysyndaǵy Maı aýdany Aqjar aýylynyń ákimi mas kúıinde kólik júrgizgeni úshin jazalandy, - dep habarlaıdy Egemen.kz
"Kýrchatovtaǵy áriptesterimiz oqıǵa týraly habardar etti, biz mán-jaıyn bilý úshin dereý sol jerge attandyq. Aýyl ákimi jumys ýaqytynan tys ýaqytta, ıaǵnı senbide keshke qala ishinde qyzmettik kólikti mas kúıinde júrgizgen", - dedi Pavlodar oblysynyń etıka jónindegi ýákili Dıdar Ybyraev.
Medısınalyq saraptama kórsetkendeı, sheneýnik qyzmettik kólikti ortasha deńgeıdegi mas kúıinde basqarǵan.
"Sot qaýlysymen quqyq buzýshy Ákimshilik kodekstiń 608-baby 1-bóligi ("Kólik quralyn masań kúıdegi adamnyń basqarýy") boıynsha ákimshilik quqyq buzýshylyq jasaǵany úshin kináli dep tanylyp, 15 táýlikke ákimshilik qamaýǵa alý túrindegi ákimshilik jazaǵa tartyldy", - dedi sottyń baspasóz qyzmeti.
Sonymen qatar, sot ákimdi jeti jylǵa kólik júrgizý kýáliginen aıyrǵan.