Kúni keshe ǵana Ulttyq akademııalyq kitaphanada Mádenıet jáne sport mınıstrliginiń uıymdastyrýymen Qazaqstan kitaphanalarymen birlesken «Zamanaýı kitaphananyń jańa kelbeti – oqý mádenıetin qalyptastyrýdyń jańa formaty» taqyrybynda dóńgelek ústel ótti.
Onlaın rejimde ótken sharaǵa Mádenıet jáne sport mınıstrliginiń Mádenıet jáne óner isteri departamentiniń dırektory Kúmis Seıitova, Mádenıet jáne sport mınıstrliginiń Mádenıet jáne óner isteri departamentiniń Mýzeıler men kitaphanalar basqarmasynyń basshysy, hatshy Gúlzeınep Pazylova, Ulttyq akademııalyq kitaphanasynyń dırektory Úmithan Muńalbaeva, Qazaqstan Respýblıkasy Ulttyq kitaphanasynyń basshysy Baqytjamal Ospanova, sondaı-aq «zoom» platformasy arqyly basqa aımaqtardaǵy kitaphana dırektorlary qatysty.
Dóńgelek ústel barysynda Mádenıet jáne sport mınıstrliginiń Mádenıet jáne óner isteri departamentiniń dırektory K.Seıitova atalǵan sharanyń mańyzdylyǵyna toqtalyp: «Memleket basshysy Qasym-Jomart Toqaev aǵymdaǵy jyldyń 22 qazanynda ótken Ulttyq qoǵamdyq senim keńesiniń IV otyrysynda jasaǵan baıandamasynda kitaphanalar aǵartýshylyq rólin joǵaltpaı, zamanaýı talaptarǵa saı bolý kerektigin atap ótti. Sondaı-aq kitaphanalardyń óskeleń urpaq boıynda oqý mádenıetin qalyptastyrý, oqý saýattylyǵyn damytý isindegi erekshe róline bas nazar aýdarǵan edi. Osyǵan oraı repýblıkalyq jáne jergilikti atqarýshy organdaryna qarasty kitaphanalar ózderiniń dástúrli qyzmet kórsetý sapasyn arttyryp, ýaqyt talaptaryna saı oqyrmandardy tartýdyń jańa joldaryn izdestirý qajettiligi týyndap otyr», dedi.
Aıta keteıik, jastarǵa arnalǵan kovorkıng ortalyqtaryn ashý Elbasy N.Á.Nazarbaevtyń partııany jańǵyrtý boıynsha tapsyrmasymen oryndalǵan bolatyn. Jáne osy maqsatta byltyrǵy Jastar jyly qarsańynda elimizdiń barlyq aımaqtaryndaǵy kitaphanalarda jastar kovorkıng ortalyqtary ashylǵan edi. Bul týraly Ulttyq akademııalyq kitaphanasynyń dırektory Ú.Muńalbaeva da óz sózinde aıtyp ótti. «Qazirgi kezde barlyq Qazaqstan kitaphanalary birigip, serpilis jasaýymyz kerek. Memleket basshysy bizge úlken senim artyp otyr. Sol senimdi aqtaý úshin, eń aldymen, jastardyń kitap oqýǵa degen talpynysyn arttyrý shart. Álbette, jastar kovorkıng ortalyqtary jastardyń ǵylym-bilimge degen qyzyǵýshylyǵyn arttyrýǵa kómekshi bir qural», dedi ol.
Naqtylap aıtsaq, kovorkıng ortalyqtary – jastar uıymdarynyń jumysyn júzege asyrýǵa múmkindik beretin ujymdyq keńse qyzmeti. Jastarǵa dástúrli kitaphanalardyń ishinde jaǵdaı jasap, ǵylym-bilimge degen qulshynysyn arttyrýdy maqsat tutqan bul joba zamanaýı kitaphanalyq júıeniń bir sıpaty ispettes. Munda áleýmettik jobalar aıasynda jastar túrli formattaǵy is-sharalardy ótkizip, keńes alyp, ıdeıalaryn talqylaýǵa múmkindik alady.