Premer-Mınıstr Asqar Mamın Qazaqstan aýmaǵynda koronavırýs ınfeksııasynyń taralýyna jol bermeý jónindegi vedomstvoaralyq komıssııanyń selektorlyq otyrysyn ótkizdi, dep habarlaıdy Egemen.kz.
Sanıtarlyq-epıdemıologııalyq ahýal men qabyldanyp jatqan sharalar týraly densaýlyq saqtaý mınıstri A. Soı, sanıtarlyq talaptardyń saqtalýyn baqylaý týraly ishki ister mınıstri E. Turǵymbaev, PTR-dıagnostıkalaý men jeke qorǵanysh quraldarynyń baǵa saıasatyna monıtorıng júrgizý jumysy boıynsha Básekelestikti qorǵaý jáne damytý agenttiginiń tóraǵasy S. Jumanǵarın, turǵyndarmen aqparattyq-túsindirý jumystaryn júrgizý týraly aqparat jáne qoǵamdyq damý mınıstri A. Balaeva, óńirlerdegi ahýal týraly Qostanaı oblysynyń ákimi A. Muhambetov, Batys Qazaqstan oblysynyń ákimi Ǵ. Esqalıev, Aqmola oblysynyń ákimi E. Marjyqpaev baıandady.
Erte vaksınasııalaý, jappaı maska taǵý rejımin jáne ara qashyqtyqty saqtaý sharalarynyń arqasynda bıyl kúzde halyqtyń pnevmonııamen jáne JRVI-men syrqattanýshylyǵy turaqty tómendeý dınamıkasyna ıe. Mysaly, tek qazan aıynda osy jyldyń qyrkúıek aıymen salystyrǵanda, pnevmonııamen aýyrǵandar sany 26%-ǵa, 24,8 myńnan 18,3 myńǵa deıin azaıdy, al jiti respıratorlyq vırýstyq ınfeksııamen aýyrǵandar 7,6%-ǵa, 286,8 myńnan 265,3 myń adamǵa deıin azaıǵan. О́tken jylmen salystyrǵanda JRVI-men aýyrý 1,7 ese – 2019 j. qazandaǵy 441,2 myńnan bıyl qazanda 265,3 myńǵa deıin tómendedi.
Sonymen qatar barlyq óńirde COVID-19-ben aýyrý jaǵdaılarynyń artqany baıqalady. Vırýstyń reprodýktıvtik ındeksi respýblıka boıynsha – 1,2, ınfeksııalyq tósek oryndarynyń toltyrylýy 21%, reanımasııalyq tósek oryndarynyń júktemeligi 17% quraıdy. Shyǵys Qazaqstan jáne Pavlodar oblystary — qyzyl aımaqta, Batys Qazaqstan, Qostanaı, Aqmola jáne Soltústik Qazaqstan oblystary — sary aımaqta.
Premer-Mınıstr qyzyl jáne sary aımaqtardaǵy óńirlerdiń ákimderine jaǵdaıdy turaqtandyrý boıynsha qosymsha sharalar qabyldap, máseleni erekshe baqylaýda ustaýdy tapsyrdy.
Densaýlyq saqtaý mınıstrligine:
Barlyq medısınalyq qyzmetterdiń ortalyq jáne óńirlik deńgeıde syrqattanýshylyqtyń yqtımal ósý jaǵdaıyna tolyq daıyndyǵyn qamtamasyz etý;
Halyqpen shekteý sharalaryn saqtaý jóninde túsindirý jumystaryn turaqty negizde júrgizý;
Shekara qyzmetimen, óńirlerdiń ákimdikterimen birlesip, sheteldikterge Qazaqstanǵa kirý úshin beriletin densaýlyq saqtaý uıymdarynyń shaqyrý qujattaryna baqylaýdy kúsheıtý;
Ádilet mınıstrligimen, ákimdiktermen birlesip, QR aýmaǵynda emdelý úshin shetel azamattaryna shaqyrý berýge ýákiletti, óńirlerdegi densaýlyq saqtaý uıymdarynyń tizbesin aıqyndaý tapsyryldy. Ishki ister mınıstrligine halyq pen bıznes sýbektileriniń shekteý jáne karantın sharalaryn saqtaýyn baqylaý jónindegi monıtorıngtik toptardyń jumysyn kúsheıtý tapsyryldy (bıylǵy 17 tamyzdan bastap elimizde 41 myń reıdtik tekserý júrgizildi, 8,7 myń karantındi buzý faktisi anyqtaldy).