Senattyń Áleýmettik-mádenı damý jáne ǵylym komıtetiniń basshysy Murat Baqtııarulynyń tóraǵalyq etýimen "Ulttyq qundylyqtar – rýhanı jańǵyrýdyń negizi" taqyrybyna arnalǵan dóńgelek ústel boldy, dep habarlaıdy Egemen.kz.
Bul shara parlamenttik tyńdaýǵa daıyndyq aıasynda ótken bolatyn.
Dóńgelek ústel otyrysyna Parlament Senatynyń depýtattarynan basqa aqparat jáne qoǵamdyq damý, mádenıet jáne sport, bilim jáne ǵylym mınıstrlikteriniń basshylyǵy, sondaı-aq Mámbet Qoıgeldıev, Asyly Osmanova, Rahman Alshanov, Ýálıhan Qalıjanov, Anar Fazyljanovajáne basqa da kórnekti memleket jáne qoǵam qaıratkerleri men zııaly qaýym ókilderi qatysty.
"Búgingi ǵylym men bilimniń, tehnıka men tehnologııanyń damyǵan zamanynda jas urpaq óte úlken aqparat aǵynynyń astynda qalyp qoıýda. Bul rette biz óz elimizdiń ulttyq qundylyqtaryn únemi alǵy shepke shyǵaryp dáriptep, tiriltip otyrmasaq, jastardy ulttyq bolmysynan aıryp alý qaýpi basym ekenin aıtqym keledi. Búgin de osy máseleler jaıly Sizderdiń tereń, zerdeli usynystaryńyzdy tyńdaımyz dep úmittenemin", dedi komıtet tóraǵasy Murat Baqtııaruly.
Negizgi baıandama jasaǵan senator Baqytjan Jumaǵulov elimizdiń ár otbasyna, jeke azamatyna qatysty ulttyq joba qajet ekenin aıta kelip, osy taqyryp boıynsha Parlamenttik tyńdaý ótkizý ıdeıasy týyndaǵanyn atap ótti. Senator ózgeden góri – ózin, qoǵamnan góri – jeke otbasynyń paıdasyn oılaıtyn, rýhanı jaǵynan birshama júdeý, bilim jaǵynan saıazdaý urpaq kóbeıgenine alańdaýshylyq bildirdi.
Senator Qazaqstan Respýblıkasynyń Prezıdenti Q.Toqaevtyń Qazaqstan halqyna "Jańa jaǵdaıdaǵy Qazaqstan: Is-qımyl kezeńi" atty Joldaýynda "Qazirgi mindet – halqymyzdyń jańa bolmysyn qalyptastyrý, tutas ult sapasyn arttyrý" degenin eske sala kelip, ol jaıynda óz oılaryn ortaǵa saldy.
Depýtat dóńgelek ústelge qatysýshylarǵa "Uly dalanyń ulttyq qundylyqtary" tujyrymdamasyn tanystyrdy. Senatordyń pikirinshe, el damýynyń osy kezeńinde mańyzdy bolyp tabylatyn bes baǵyt: táýelsizdik jáne tarıhı tanym; el men jer; til jáne ımandylyq; ulttyq dástúr jáne otbasylyq tárbıe; bilim men biliktilik tujyrymdamanyń negizin quraıdy.
Senator ulttyq dástúr, tárbıe, bilim máselelerine erekshe toqtaldy. "Bala – besikten tárbıe alady. Ulttyq dástúrdi boıǵa sińiredi. Ana joldan taısa – ult joldan taıady. Áke joldan taısa – ult tozady. Qoǵam joldan taısa – Táýelsizdikten aırylady. Ulttyq dástúr jáne otbasylyq tárbıe – patrıotızmniń bastaýy. Besikten tárbıeleý – ulttyq uǵym kepili. Bilimi joq el – bedelsiz, ǵylymy joq el – bedersiz.Qalyptasqan jaǵdaıda bilim men ǵylymnyń júıesin qaıta qaraý kerek", dedi senatorBaqytjan Jumaǵulov.
"Ulttyq qundylyqtarymyzdy Qazaqstannyń árbir azamatynyń sanasyna engizý jáne ornyqtyrý qajet. Búgingi dóńgelek ústeldiń de kózdegen maqsaty osy. Birlese, irgemizdi ydyratpaıtyn, ulttyq qundylyqtarymyzdy ulyqtaıtyn kózqarasqajet. Árbir Qazaqstan azamatynyń boıyna ulttyq patrıotızmdi qalyptastyratyn joldaryn aıqyndap bergen durys bolar edi. Sonda ǵana, táýelsiz elimizde ulttyq qundylyqtarymyzdy kúndelikti ómirge engize alamyz", dedi Baqytjan Jumaǵulov.
Dóńgelek ústelde "Rýhanı jańǵyrý" baǵdarlamasyndaǵy arnaýly jobalardy iske asyrý barysy da talqylandy. Zııaly qaýym ókilderi halyqtyń birligin nyǵaıtý men tarıhı tanymyna, sondaı-aq memlekettik tildi damytýǵa qatysty óz oılaryn ortaǵa saldy.