О́ńir aýrýhanalarynda koronavırýs ınfeksııasyn juqtyrǵandardy qashyqtan chek-paraqtary arqyly baqylaý qolǵa alyndy. Osyǵan oraı №2 oblystyq ınfeksııalyq aýrýhanasy COVID-19 bólimshesiniń meńgerýshisi Nurfııa Qızatovanyń málimetinshe, koronavırýs ınfeksııasyn juqtyrýǵa kúdikti, ne indettiń belgisi anyqtalǵan naýqastardyń jaǵdaıyn baǵalap, olardy qashyqtan baqylaý úshin arnaıy chek-paraqtar engizilip otyr.
– Mobıldi brıgada mamandary chek-paraqtar arqyly qaýipti indet aǵynynyń aýyrlyǵyna baılanysty naýqasty aýrýhanaǵa jatqyzý týraly sheshim qabyldaı alady. Mundaı sheshimge dene qyzýynyń kóterilýi, entigý sekildi belgiler bolǵanda ǵana emes, naýqastaǵy ilespe aýrýlardyń jáne adam ómirine qaýip tóndiretin faktorlardyń birqatar parametri yqpal etedi, – deıdi Nurfııa Qızatova.
Dárigerdiń aıtýynsha, qaýipti indet jedel respıratorly vırýstyq ınfeksııasymen qabattasyp kelýi múmkin. Sol sebepten COVID-19 ınfeksııasynyń sımptomsyz túrine shaldyqqan naýqas medısına mamanynyń baqylaýyna alyný tıis. Osy oraıda medısına mamanynyń kómegimen naýqastyń ózi toltyratyn chek-paraqtyń mańyzy zor.
Al №2 oblystyq ınfeksııalyq aýrýhanasynyń dırektory Maǵjan Sıdjanovtyń pikirinshe, turǵyndar qaýipti indettiń aldyn alý sharalarynan udaıy habardar bolýy kerek. Indet juqtyrmaýdyń eń tıimdi joly – adam kóp jınalatyn jerlerge barmaý.
– Qazir mektepterdegi kezekshi synyptarda sabaq bastaldy. Ata-analardan balalaryn qorǵaýdy suraımyz. Balalardyń jaı-kúıin baqylap otyrǵan jón. Dene qyzýy kóterilgen bolsa, mektepke jibermeý qajet. Epıdemııa kezeńinde ózge de ınfeksııalyq aýrýlardyń aldyn alý maqsatynda josparly ekpelerdi alý úshin emhanaǵa ýaqtyly barǵan durys, – deıdi M.Sıdjanov.
Atyraý oblysy