Qazaqstan Qarýly Kúshteri Qurlyq áskerleriniń bas qolbasshysy general-leıtenant Murat Maıkeev «Jyl tańdaýy – Jyl adamy» halyqaralyq festıvaliniń qorytyndysy boıynsha 2013 jyldyń áskerı adamy dep tanyldy. M.Maıkeev «2013 jyldyń áskerı adamy» nomınasııasyndaǵy jeńisi úshin «Altyn adam» músinshesimen marapattaldy.
Jyl saıynǵy «Jyl tańdaýy – Jyl adamy» festıvaliniń jeńimpazdaryn marapattaý saltanaty bıyl Almaty qalasynda ótkizildi. Abaı atyndaǵy Qazaq memlekettik akademııalyq opera jáne balet teatrynda ótken sharada 2013 jyldyń túrli saladaǵy úzdikteriniń esimderi jarııalandy. Olardyń qatarynda ásker, mádenıet, óner, bıznes, medısına, sport jáne taǵy basqa salalardyń maıtalmandary bar.
«Qazaqstandaǵy jyl tańdaýy №1» festıvali TMD-nyń bes elinde ótkiziledi jáne halyqaralyq mártebege ıe. Syılyqtyń ıegerlerin áleýmettik saýaldamalardyń kómegi arqyly táýelsiz sarapshylar tańdaıdy.
General-leıtenant M.Maıkeev 1959 jylǵy 9 qarashada Aqtóbe qalasynda týǵan. 1980 jyly Almaty joǵary jalpyáskerı komandalyq ýchılıshesin bitirgen, al 1994 jyly M.V.Frýnze atyndaǵy Áskerı akademııany támamdady.
3-dárejeli «Otanǵa qyzmeti úshin», 2-dárejeli «Aıbyn», 2-dárejeli «Dańq» ordenderimen jáne medaldarmen marapattalǵan.
«Egemen-aqparat».